31 mart – Azərbaycanlıların Soyqırımı Günü Serbiyada ehtiramla anılıb
Belqrad, 1 aprel, AZƏRTAC
Azərbaycanın Serbiyadakı səfirliyində 31 mart - Azərbaycanlıların Soyqırımı Günü ilə bağlı anma mərasimi keçirilib.
Tədbirdə səfirliyin əməkdaşları ilə yanaşı Belqradda fəaliyyət göstərən Azərbaycan Mədəniyyət Mərkəzinin, Serbiya-Azərbaycan Ticarət Palatasının, Serbiya-Azərbaycan Dostluq Cəmiyyətinin və bu ölkədə yaşayan Azərbaycan icmasının üzvləri, burada təhsil alan tələbələrimiz, Serbiya ictimaiyyətinin və Belqrad şəhərinin müsəlman icmasının nümayəndələri iştirak ediblər.
Tədbir zamanı xalqımıza qarşı törədilmiş soyqırımının tarixindən bəhs edilib, 1905-1907-ci illərdə Bakı, Şuşa, Zəngəzur, İrəvan, Naxçıvan, Ordubad, Eçmiədzin, Cavanşir və Qazax bölgələrində ermənilər tərəfindən azərbaycanlılara qarşı törədilmiş vəhşiliklər barədə məlumat verilib. Bildirilib ki, 1918-ci ilin mart-aprel aylarında Bakı, Şamaxı, Quba, Muğan və Qarabağ bölgələrində minlərlə azərbaycanlı xüsusi amansızlıqla qətlə yetirilib, on minlərlə soydaşımız evlərindən didərgin düşüb. Ermənilər tərəfindən Azərbaycana qarşı həyata keçirilən işğalçılıq siyasəti bu gün də davam etməkdədir. Anma mərasimində Ermənistan-Azərbaycan, Dağlıq Qarabağ münaqişəsi, erməni yaraqlılarının törətdikləri və öz amansızlığı ilə seçilən vəhşiliklər, Xocalı soyqırımı, işğal olunmuş ərazilərimizdəki mədəniyyət abidələrinin dağıdılması ilə bağlı məlumat verilib. Vurğulanıb ki, bütün bunlar Ermənistanın dövlət siyasətinin tərkib hissəsidir.
Tədbir iştirakçıları martın 31-nin azərbaycanlıların soyqırımı günü kimi qeyd olunması haqqında ümummilli lider Heydər Əliyevin 1998-ci il 26 mart tarixli Fərmanının əhəmiyyətini qeyd ediblər, bu sənədin xalqımızın milli şüurunun oyanmasında mühüm rol oynadığını bildiriblər.
Sonra Azərbaycan Respublikasının İnsan Hüquqları üzrə Müvəkkilinin (Ombudsmanın) 31mart - Azərbaycanlıların Soyqırımı Günü ilə əlaqədar bəyanatı oxunub.
Tədbirdə Azərbaycanın dilbər guşələrindən olan, mühüm strateji əhəmiyyətə malik Kəlbəcər rayonunun Ermənistan silahlı birləşmələri tərəfindən işğalının 22-ci ildönümü də xatırlanıb. Diqqətə çatdırılıb ki, Kəlbəcərin işğalı nəticəsində 511 nəfər həlak olub, 321 nəfər itkin düşüb və ya girov götürülüb, 150-yə yaxın kənd, həmçinin onlarla tarixi və mədəniyyət abidələri dağıdılıb. Bildirilib ki, hazırda 11 min Kəlbəcər rayon sakini Gəncədə, qalanları isə respublikamızın müxtəlif bölgələrində məskunlaşıb. Dövlət tərəfindən onların sosial problemlərinin həlli istiqamətində bir sıra mühüm işlər görülməkdədir.
Tədbir iştirakçıları qaçqın və məcburi köçkünlərimiz üçün yaradılan bütün imkanlara baxmayaraq, onların öz doğma yurdlarına geri dönmək arzusunu dilə gətirib və işğal olunmuş ərazilərimizin Azərbaycanda aparılan qətiyyətli daxili və xarici siyasət nəticəsində tezliklə azad ediləcəyinə, öz qohumlarının qəbirlərini ziyarət edərkən ermənilər tərəfindən girov götürülmüş kəlbəcərli məcburi köçkünlər - Dilqəm Əsgərovun və Şahbaz Quliyevin tezliklə azad ediləcəklərinə əminliklərini bildiriblər.
Azərbaycanlıların Soyqırımı Günü ilə bağlı səfirlik tərəfindən hazırlanmış mətbuat məlumatı, eləcə də Ombudsmanın bəyanatı Serbiyanın dövlət və hökumət orqanlarına, parlament üzvlərinə, qeyri-hökumət təşkilatlarına, Belqradda fəaliyyət göstərən xarici ölkələrin səfirliklərinə və beynəlxalq təşkilatların nümayəndəliklərinə göndərilib.
Maqsud Dadaşov
AZƏRTAC-ın xüsusi müxbiri
Belqrad
Bölmənin digər xəbərləri
