31 mart soyqırımı qurbanlarının xatirəsi Türkmənistanda da anılmışdır
Bakı, 31 mart (AZƏRTAC). Azərbaycanın Türkmənistandakı səfirliyində 31 mart - Azərbaycanlıların Soyqırımı Gününə həsr olunmuş anma mərasimi keçirilmişdir.
Səfirlikdən AZƏRTAC-a bildirmişlər ki, soyqırımı qurbanlarının xatirəsi bir dəqiqəlik sükutla yad edildikdən sonra səfir Vəhdət Sultanzadə Azərbaycan xalqına qarşı 1918-ci ilin martında törədilmiş qətliamın tariximizin faciəli səhifələrindən biri olduğunu demişdir. İki əsr ərzində bir milyondan artıq azərbaycanlının ermənilər tərəfindən vəhşicəsinə qətlə yetirildiyini qeyd edən diplomat vurğulamışdır ki, bu qanlı faciəyə yalnız ümummilli lider Heydər Əliyevin “Azərbaycanlıların soyqırımı haqqında” 1998-ci il 26 mart tarixli Fərmanında əsl hüquqi-siyasi qiymət verilmişdir.
Digər çıxış edənlər dünya birliyi tərəfindən ermənilərin azərbaycanlılara qarşı törətdikləri qırğınlara bəşəriyyətə qarşı cinayət kimi siyasi-hüquqi qiymət verilməsinin vacibliyini vurğulamış, xaricdə yaşayan soydaşlarımızı bu istiqamətdə səylərini daha da artırmağa çağırmışlar.
Mərasimdə Azərbaycan Respublikasının insan hüquqları üzrə müvəkkilinin 31 mart - Azərbaycanlıların Soyqırımı Günü ilə bağlı bəyanatı da səsləndirilmişdir. Bu bəyanatın mətni Türkmənistanın Xarici İşlər Nazirliyinə və bu ölkədə akkreditə olunmuş diplomatik nümayəndəliklərinə də göndərilmişdir.
Səfirliyin zalında azərbaycanlıların soyqırımını əks etdirən foto və kitablardan ibarət guşə yaradılmış, erməni terroru ilə bağlı sənədli filmlər nümayiş etdirilmişdir. Bundan əlavə, iştirakçılara xalqımızın üzləşdiyi faciələrlə bağlı Heydər Əliyev Fondu və Azərbaycanın Xarici İşlər Nazirliyi tərəfindən göndərilmiş materiallar, habelə səfirlik tərəfindən türkmən dilində nəşr edilmiş “Bəşəriyyət əleyhinə cinayət” adlı kitabın nüsxələri paylanmışdır.
Səfirliyin rəsmi internet saytında 31 mart - Azərbaycanlıların Soyqırımı Günü ilə bağlı məlumat yerləşdirilmişdir.
Bölmənin digər xəbərləri
