Neftçalalı fermer yeni pambıq sortu əkib, yüksək məhsuldarlıq gözləyir VİDEO
Neftçala, 14 oktyabr, İsmayıl Cəfərli, AZƏRTAC
Dövlət tərəfindən hər il pambıqçılığın inkişafına göstərilən diqqət və qayğı regionlarda fermerlərin bu sahəyə marağını daha da artırıb. Fermerlər məhsuldarlığı artıraraq, daha çox gəlir əldə etmək üçün yeni sortlara üstünlük verirlər. Neftçalalı fermer Əlibala Səlimov da bu il pambıq tarlasında yeni sort toxum əkib.
AZƏRTAC xəbər verir ki, 50 ildən çoxdur ömrünü torpağa bağlayan neftçalalı pambıq ustası, “Əmək orden”li Əlibala Səlimov yeni sortlara müraciət edən fermerlərdəndir. Ötənilki məhsuldarlıqdan o qədər də razı qalmayan ağ qızıl ustası bu dəfə yeni - “May 505” pambıq sortunun əkinini aparıb. Fermer artıq yeni məhsulun toplanması prosesinə başlayıb: “Ötən il başqa toxum əkmişdik. Keçənilki toxum xəstəliklərə, ziyanvericilərə çox davamlı deyildi. Ancaq “May 505” sortunu ilk dəfədir əkirəm. 10 hektar sahədir. Məhsuldar sortdur, xəstəliyə, ziyanvericilərə qarşı, həm də suya davamlıdır. İki dəfə vegetasiya suyu aparmışıq. Bu il ötən ilə nisbətdə məhsul 4-5 sentner artıq olacaq”.
Fermer deyir ki, pambıq zəhmət sevən bitkidir. Məhsulun bol olması seçilən sortdan və göstərilən qulluqdan çox asılıdır. Digər pambıq sortlarında 5-6 ədəd toxum olurdusa, bu il əkilən “May 505” sortunda 8-9 ədəd toxum var. Bu da pambığın olduqca məhsuldar olması deməkdir.
Dövlət də fermerlərə pambıqçılığın inkişafında dəstək olur. Subsidiyaların ayrılması, azot və gübrələrin verilməsi, kombayn və traktorlarla təminat yüksək səviyyədədir. İndi əsas məqsəd tarlalarda aparılan məhsul toplama prosesini itkisiz başa çatdırmaqdır.
Neftçala rayon Dövlət Aqrar İnkişaf Mərkəzinin bitkiçilik sektorunun müdiri Vidadi Bağırov bildirib ki, rayonda bu il 1717 nəfər istehsalçı fermer 8056.7 hektar sahədə pambıq əkini aparıb. Hazırda rayon üzrə sahələrdə pambıq toplanmasına 43 kombayn cəlb edilib. Builki orta məhsuldarlıq isə 31 sentner gözlənilir.
Bölmənin digər xəbərləri
