Bakı, 2 fevral, Göyçək Mahmudlu, AZƏRTAC

Fevralın 2-də dahi azərbaycanlı alim Lütfi Zadəyə həsr olunmuş məntiq olimpiadasının yekun təltifetmə mərasimi keçirilib.

AZƏRTAC xəbər verir ki, tədbirdə çıxış edən “ELM” Gənclərin Sosial-İntellektual İnkişafına Dəstək İctimai Birliyinin sədri, layihə rəhbəri Səbuhi Abdullayev olimpiadanın əhəmiyyətindən, gənclərimizin elmə və təhsilə olan marağından bəhs edib: “Yarış olimpiada formatında keçirildi və ilk dəfə olaraq burada məntiqlə yanaşı, qeyri-səlis məntiq nəzəriyyəsinə dair test suallarından istifadə edildi. Ümumtəhsil məktəblərində oxuyan 2-ci sinifdən 11-ci sinfə qədər 1000-ə yaxın şagird həmin layihədə iştirak etdi. Onlar arasından seçilmiş 25 nəfər xüsusi medallara layiq görüldü”.

Tədbirin əhəmiyyətindən danışan layihə rəhbəri əlavə edib: “İlk növbədə, dahi azərbaycanlı alimin nəzəriyyəsinin gənc riyaziyyatçılarımıza aşılanması baxımından önəmi qeyd olunmalıdır. Şagirdlərin qeyri-səlis məntiq nəzəriyyəsi barədə məlumatlandırılması onların Lütfi Zadə irsinə marağını daha da artıracaq. Eyni zamanda, müasir dövrdə süni intellektin hər bir sahəyə sirayət etdiyini nəzərə alsaq, məhz qeyri-səlis məntiq nəzəriyyəsi sahəsində süni intellekt daha da sürətli şəkildə inkişaf edəcək. Həmçinin ölkəmizin elmi potensialının və iqtisadiyyatının yüksəldilməsi üçün süni intellekt alətlərindən düzgün istifadə, gələcəkdə elmi-tədqiqat işlərində tətbiqi çox böyük əhəmiyyətə malik olacaq.

Layihənin davamlı olması və gələcəkdə beynəlxalq status alması üçün növbəti ildə də həyata keçirilməsi nəzərdə tutulub. Bundan əlavə, hər il olduğu kimi bu il də yaz aylarında Ulu Öndər Heydər Əliyevin anadan olmasının növbəti ildönümü ilə bağlı yarışın keçirilməsi planlaşdırılıb”.

Sonra Riyaziyyat və Mexanika İnstitutunun direktoru akademik Misir Mərdanov çıxış edərək şagirdlərə öz tövsiyələrini verib. O, ərazi bütövlüyü tam bərpa edilmiş və suveren ölkədə təhsil alan gənclərin gələcəkdə harada yaşamasından asılı olmayaraq Vətənimizi ən yüksək səviyyədə təmsil etməsinin vacibliyini diqqətə çatdırıb.

Milli Məclisin deputatı Ceyhun Məmmədov layihənin əsas məqsədinin Lütfi Zadənin qeyri-səlis məntiq nəzəriyyəsinin gənclərə aşılanması və istedadlı şagirdlərin üzə çıxarılması baxımından böyük əhəmiyyət kəsb etdiyini vurğulayıb. Bu günün gənclərinin gələcəyin liderləri olduğunu deyən deputat onların yalnız bilikli, savadlı deyil, milli-mənəvi dəyərləri mənimsəyərək və onlara əməl edərək yetişməli olduğunu qeyd edib.

Lütfi Zadə nəzəriyyəsi ilə məşğul olan professor Sədi Bayramov və Maliyyə Nazirliyinin nümayəndəsi Gündüz Əliyev isə qeyri-səlis məntiq nəzəriyyəsinin elmi və praktiki əhəmiyyətindən danışıblar.

Daha sonra “ELM” Gənclərin Sosial-İntellektual İnkişafına Dəstək İctimai Birliyi və “Master Academy” Elm və Təhsil Mərkəzinin təşkil etdiyi olimpiadada yüksək nəticə göstərən 25 şagird Lütfi Zadəyə həsr edilən xüsusi medallar və hədiyyələrlə təltif olunub.