Moskvada Ulu Öndər Heydər Əliyevə həsr olunmuş xatirə axşamı keçirilib VİDEO
Moskva, 13 may, AZƏRTAC
Ölkəmizin Rusiyadakı səfirliyində Azərbaycan xalqının Ümummilli Lideri Heydər Əliyevin anadan olmasının 102-ci ildönümünə həsr olunmuş xatirə axşamı keçirilib. Tədbir Azərbaycanın Rusiyadakı səfirliyi və Heydər Əliyev Fondunun Moskva nümayəndəliyinin birgə təşkilatçılığı ilə baş tutub.
AZƏRTAC xəbər verir ki, tədbirdə diplomatik nümayəndəliklərin rəhbərləri, Rusiyanın tanınmış ictimai xadimləri, Heydər Əliyev Fondunun Rusiyadakı nümayəndəliyinin əməkdaşları, Rusiyanın Azərbaycanlı Gənclər Birliyinin (RAGB) fəalları və Azərbaycan diasporunun tanınmış nümayəndələri iştirak ediblər.
Tədbir iştirakçılarına Ümummilli Lider Heydər Əliyevin həyat və dövləti fəaliyyətinə həsr olunmuş fotosərgi, o cümlədən Ulu Öndər haqqında nəşrlər təqdim olunub.
Giriş sözü ilə çıxış edən səfir Rəhman Mustafayev Heydər Əliyevin Azərbaycan tarixindəki müstəsna rolundan, müasir Azərbaycan dövlətçiliyinin formalaşmasında böyük xidmətlərindən danışıb.
Diplomat çıxışında Heydər Əliyevlə XX əsrin məşhur tarixi şəxsiyyətləri - Almaniyada Konrad Adenauer, Türkiyədə Mustafa Kamal Atatürk və Fransada Şarl de Qoll arasında paralellər aparıb. O, Heydər Əliyev və Şarl de Qollun taleyini müqayisə edərək vurğulayıb: “Bu iki siyasi fiqurun ortaq cəhətləri çoxdur. Hər ikisi ölkə ağır böhran vəziyyətində olanda hakimiyyətə qayıdıb”. Səfir Azərbaycanın 1993-cü ildə vətəndaş müharibəsi ərəfəsində olduğunu, işğal olunmuş əraziləri, yüz minlərlə qaçqın, hakimiyyətin iflic vəziyyəti və dərin iqtisadi böhranla üzləşdiyi ağır vəziyyətə düşdüyünü xatırladıb. O əlavə edib: “Bu, faktiki olaraq vətəndaş müharibəsi astanasında olan Azərbaycan idi, ərazisinin bir hissəsi işğal olunmuşdu”.
Diplomat rəmzi bir məqama da toxunaraq bildirib ki, o, mayın 9-da Qırmızı meydanda keçirilən Qələbə paradında bir çox azərbaycanlı kimi qürur hissi keçirib: “Azərbaycan Bayrağı ilə bu meydandan təntənəli şəkildə keçən hərbçilərimizi izləyəndə, təbii ki, tamam başqa Azərbaycanı xatırladım...Başa düşdüm ki, Heydər Əliyev olmasaydı, Qırmızı meydandan keçən hərbçilərimizin də bu marşı olmazdı”.
Xarici siyasətdən danışan səfir xüsusi vurğulayıb ki, Heydər Əliyevin Qərb liderlərinin malik olduğu geosiyasi “çətiri” yox idi. “Marşal Planı yox idi. Kənardan nə maliyyə, nə iqtisadi, nə siyasi, nə də geosiyasi dəstək mövcud deyildi. Yəni, bu “çətiri” Heydər Əliyev özü, öz əli ilə yaradıb”, -deyə diplomat qeyd edib. O əlavə edib ki, Ulu Öndərin dövründə həyata keçirilən balans və enerji layihələri strateji tərəfdaşlıq münasibətlərinin əsasını təşkil edib: “Buna görə də, təbii olaraq deyirik ki, bu gün gördüyümüz Azərbaycanın – sabit, nüfuzlu və strateji cəhətdən müstəqil dövlətin əsasını məhz o qoyub”.
Rusiya Federasiyası xarici işlər nazirinin müavini Mixail Qaluzin çıxışında Heydər Əliyevin Sovet İttifaqının və müstəqil Azərbaycanın tarixində müstəsna rolunu vurğulayıb. O deyib: “Heydər Əlirza oğlunun xatirəsi qəlbimizdə yaşayır və bu, bizim ümumi tarixi keçmişimizin parlaq rəmzidir”. Nazir müavini xatırladıb ki, Heydər Əliyev 1982-1986-cı illərdə SSRİ Nazirlər Soveti sədrinin birinci müavini kimi maşınqayırma və ticarətdən tutmuş mədəniyyət və nəqliyyata qədər 12-dən çox nazirliyin işini əlaqələndirib. Onun şəxsi nəzarəti altında əhəmiyyəti bu gün də aktuallığını qoruyan əsas infrastruktur layihəsi olan Baykal-Amur magistral xəttinin tikintisi gedirdi.
İkinci Dünya müharibəsində Qələbənin 80 illiyi kontekstində çıxış edən Rusiya XİN rəhbərinin müavini mayın 9-da Azərbaycan hərbçilərinin Qırmızı meydanda keçirilən paradda iştirakının rəmzi olduğunu qeyd edib: “Bu, qəhrəmanlıq ənənələrinin davamlılığını və əlaqələrimizin müttəfiqlik xarakterini nümayiş etdirən daha bir mühüm xatirə estafetidir”.
Dövlətlərarası Aviasiya Şurasının prezidenti Tatyana Anodina, sənətşünas Zelfira Trequlova, MDBMİ-nin inkişaf üzrə prorektoru, rektorluq aparatının rəhbəri Artyom Malqin, Sosialist Əməyi Qəhrəmanı, BAM-ın işçisi Leonid Kazakov və başqaları xatirələrini bölüşüblər.
Tədbirdə, həmçinin Rusiyanın elmi və dini qurumlarının rəhbərləri adından mesajlar oxunub. Müsəlmanların Ruhani İdarəsi sədrinin birinci müavini Damir Muxetdinov Rusiya Federasiyası Müsəlmanları Ruhani İdarəsinin sədri Ravil Qaynutdinin adından müraciəti oxuyub. Rusiya Elmlər Akademiyasının vitse-prezidenti Stepan Kalmıkov Rusiya Elmlər Akademiyasının prezidenti Gennadi Krasnikovun məktubunu təqdim edib.
Xatirə axşamı klassik musiqidən ibarət konsert proqramı ilə davam edib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
