On iki gün komada qaldıqdan sonra şəhidlik zirvəsinə ucalan xaçmazlı topoqraf VİDEO
Xaçmaz, 4 oktyabr, Elxan Yusifli, AZƏRTAC
Baş gizir Mahir Məmmədov Vətən müharibəsində Füzuli istiqamətində döyüşərkən yaxınlığında artilleriya mərmisinin partlaması nəticəsində ağır yaralanıb. Qəhrəman döyüşçü 12 gün komada qaldıqdan sonra şəhidlik zirvəsinə ucalıb.
AZƏRTAC-ın bölgə müxbiri xəbər verir ki, Mahir Ağasəlim oğlu Məmmədov 1981-ci il yanvarın 28-də Xaçmaz rayonunun Şıxhaput kəndində anadan olub. Ömrünün 17 ilini hərbçi kimi Vətənə xidmətə həsr edib.
Təcrübəli hərbçi 2016-cı ilin Aprel döyüşlərində düşmənə qarşı savaşıb. Bu döyüşlərdə göstərdiyi şücaətə görə medal və fəxri fərmanlarla təltif olunub.
Vətən müharibəsi başlayan ilk gündən döyüşlərə qoşulub və düşmənin hərbi obyektlərinin məhv edilməsi zamanı fəallıq göstərib. Mahir Məmmədov oktyabrın 7-də Füzuli istiqamətində döyüşərkən yaxınlığında artilleriya mərmisinin partlaması nəticəsində ağır yaralanıb.
“2003-cü ildən hərbçi kimi xidmət edirdi. Vətən müharibəsi başlayanda döyüşlərə qatıldı. Mahir ən yaxşı hərbi topoqraflardan biri idi. Müharibə vaxtı imkan olanda danışırdıq. Bizə hər şeyin yaxşı olduğunu bildirirdi. Anamı çox sevirdi. İstəmirdi o narahat olsun. Füzulinin Qaraxanbəyli kəndi uğrunda gedən döyüşlər zamanı baş nahiyəsindən yaralanıb. Komaya düşüb. Bizim xəbərimiz yox idi. Sonra bildirdilər ki, hospitaldadır. Pandemiya dövrü idi, gedib görə də bilmədik. 12 gün komada qaldıqdan sonra şəhidlik zirvəsinə ucaldı”, - deyə şəhidin qardaşı Habil Məmmədov söyləyib.
Mahir 2019-cu ildə ailə həyatı qurmuşdu. Vətən müharibəsindən altı gün əvvəl oğlu Səlimin doğulması xəbərinə çox sevinmişdi. Amma təəssüf ki, yeni doğulan oğlunu qucağına almaq ona qismət olmadı.
“Çox ağıllı, zarafatcıl idi mənim balam. Mən həm də məktəbdə onun müəllimi olmuşam. Rəsmxət fənni üzrə dərs deyirdim. Mahir də getdi hərbidə xəritə çəkən oldu. Müharibə başlayanda övladı yenicə doğulmuşdu. Zəng edib mənimlə danışanda körpə ağlayırdı. Səsini eşidib soruşurdu ki, niyə ağlayır? Mahir övladının ancaq səsini eşitdi. Gəlib üzünü görə bilmədi. İndi Səlimin 5 yaşı var. Atasını şəkillərdən tanıyır. Oğlumun ətrini ondan alıram”, - deyə şəhidin anası Timziyə Məmmədova söyləyib.
Mahir Məmmədov ölümündən sonra "Cəsur döyüşçü", “Füzulinin azad olunmasına görə” və “Vətən uğrunda” medalları ilə təltif olunub.
Şəhid Mahir Məmmədovun həyat yoldaşı və oğlu Bakının Sabunçu rayonunda şəhid ailələri və müharibə əlilləri üçün nəzərdə tutulan yeni yaşayış kompleksində mənzillə təmin edilib. Azərbaycan Respublikasının Prezidenti İlham Əliyev və birinci xanım Mehriban Əliyeva 2022-ci il mayın 2-də yaşayış kompleksinin açılışında iştirak edərkən evlə təmin olunmuş Məmmədovlar ailəsinin qonağı olublar.
Bölmənin digər xəbərləri
