Cəlilabadda Novruz ab-havası FOTOLARDA VİDEO
Cəlilabad, 19 mart, AZƏRTAC
Novruz bayramı ölkəmizin hər yerində olduğu kimi, bölgələrdə də xüsusi təntənə və qədim el adət-ənənələri ilə qarşılanır. Bu münasibətlə Cəlilabadda təşkil olunan ümumrayon şənliyi baharın gəlişini əsl xalq bayramına çevirib.
AZƏRTAC-ın bölgə müxbiri xəbər verir ki, bayram tədbiri çərçivəsində Cəlilabad rayonunda fəaliyyət göstərən sahibkarların məhsullarından ibarət geniş sərgi-yarmarka təşkil olunub. Rayonun münbit torpaqlarında yetişdirilən kənd təsərrüfatı məhsulları, yerli istehsal olan qidalar və əl işləri qonaqların böyük marağına səbəb olub. Bu təqdimatlar bölgənin həm iqtisadi potensialını, həm də zəhmətkeş insanlarının bacarığını nümayiş etdirib.
Tədbirin ən rəmzi məqamı isə bayram tonqalının alovlandırılması olub. Odun ətrafına toplaşan sakinlər baharın istisini və ruzi-bərəkətini müjdələyən bu qədim ənənəni böyük sevinclə qarşılayıblar. Daha sonra iştirakçılar üçün hazırlanan zəngin və rəngarəng konsert proqramı bayram coşqusunu daha da artırıb.
Şənlik zamanı qədim milli oyunlarımız təqdim edilib, ustad sənətkarların ifasında milli musiqilər səsləndirilib və xalq rəqsləri nümayiş olunub. Xüsusilə idmançıların çıxışları və folklor qruplarının təqdim etdiyi qədim el nəğmələri tədbirə xüsusi rəng qatıb. Gənclərin hazırladıqları yaradıcı kompozisiyalar və Novruzun personajları olan Kosa ilə Keçəlin məzəli deyişmələri həm böyüklərin, həm də uşaqların üzündə xoş təbəssüm yaradıb.
Bu bayram şənliyi Cəlilabad sakinlərinin birliyini, milli-mənəvi dəyərlərə sadiqliyini və baharın gəlişi ilə doğan yeni ümidləri bir daha təcəssüm etdirib.
Müxbir - İlkin Adıyev
Bölmənin digər xəbərləri
