Xankəndidə işğaldan azad olunmuş ərazilər üzrə ilk iri özəl tibb müəssisəsi fəaliyyətə başlayıb VİDEO
Xankəndi, 25 iyun AZƏRTAC
İyunun 25-də Xankəndi şəhərində işğaldan azad olunmuş ərazilər üzrə ilk iri özəl tibb müəssisəsi olan Xankəndi Tibb Mərkəzinin açılış mərasimi keçirilib. Mərasimdə Azərbaycan Respublikası Prezidentinin Xankəndi şəhəri, Ağdərə və Xocalı rayonlarında xüsusi nümayəndəliyinin əməkdaşları, səhiyyə ictimaiyyətinin nümayəndələri, tibb işçiləri, elm adamları, ictimai xadimlər, media nümayəndələri və şəhər sakinləri iştirak ediblər.
AZƏRTAC-ın bölgə müxbiri xəbər verir ki, əvvəlcə Azərbaycanın Dövlət Himni səsləndirilib, şəhidlərin əziz xatirəsi bir dəqiqəlik sükutla yad olunub.
Tədbirdə çıxış edən Azərbaycan Respublikası Prezidentinin Xankəndi şəhəri, Ağdərə və Xocalı rayonlarında xüsusi nümayəndəsinin müavini Səbuhi Qəhrəmanov işğaldan azad edilmiş ərazilərdə aparılan bərpa-quruculuq işləri, əhalinin keyfiyyətli səhiyyə xidmətləri ilə təmin olunması istiqamətində görülən tədbirlər barədə məlumat verib. Bildirib ki, Prezident İlham Əliyevin rəhbərliyi ilə işğaldan azad edilmiş ərazilərdə genişmiqyaslı bərpa və quruculuq işləri uğurla davam etdirilir. Bölgədə müasir infrastrukturun yaradılması ilə yanaşı, səhiyyə xidmətlərinin inkişafı da dövlət siyasətinin mühüm istiqamətlərindən biridir. O qeyd edib ki, Xankəndi Tibb Mərkəzinin fəaliyyətə başlaması regionun sosial həyatında əlamətdar hadisə olmaqla yanaşı, özəl sektorun Qarabağın inkişafına verdiyi mühüm töhfənin göstəricisidir.
Səbuhi Qəhrəmanov Xankəndi Tibb Mərkəzinin kollektivinə uğurlar arzulayıb, mərkəzin region əhalisinin keyfiyyətli tibbi xidmətlərə çıxış imkanlarının genişləndirilməsində mühüm rol oynayacağına əminliyini ifadə edib.
Sonra qonaqlar mərkəzdə yaradılmış şəraitlə tanış olublar. Bildirilib ki, ən müasir tibbi avadanlıqlarla təchiz olunmuş tibb müəssisəsində ambulator konsultativ xidmətlər, ailə həkimliyi, terapevtik xidmətlər, pediatriya, ginekologiya, kardiologiya, nevrologiya, laborator diaqnostika, ultrasəs müayinələri, funksional diaqnostika, profilaktik müayinələr (check-up proqramları) və digər ixtisaslaşmış tibbi xidmətlərin göstərilməsi nəzərdə tutulur.
Qeyd olunub ki, Xankəndi Tibb Mərkəzinin əsas məqsədi bölgə əhalisinə beynəlxalq standartlara uyğun, əlçatan və keyfiyyətli tibbi xidmət göstərmək, erkən diaqnostika və profilaktik təbabətin inkişafına töhfə verməkdir.
Açılış mərasimindən sonra Xankəndi Konqres Mərkəzində Xankəndi Tibb Mərkəzinin açılışına həsr olunmuş elmi-praktik konfrans keçirilib.
Konfransın açılışında çıxış edən Səbuhi Qəhrəmanov bildirib ki, müasir səhiyyənin əsas prinsiplərindən biri yalnız müalicə deyil, həm də cəmiyyətin sağlamlıqla bağlı maarifləndirilməsidir. Xankəndidə fəaliyyətə başlayan yeni tibb mərkəzinin ilk gündən elmi-praktik konfrans təşkil etməsi bu müəssisənin gələcək fəaliyyət istiqamətlərini və səhiyyəyə yanaşmasını aydın şəkildə nümayiş etdirir.
Elmi-praktik konfrans iki panel üzrə davam edib. “Sağlam həyata aparan doğru addımlar” mövzusunda keçirilən birinci panelə tibb üzrə fəlsəfə doktoru Yavər Hacısoy və Dr. Cahan Hacızadə sədrlik ediblər. Paneldə mütəxəssis Dr. Ülviyyə Namazova “Ürək sağlamlığı haqqında doğru bilinən yanlışlar”, uzman Dr. Afaq Əhmədova “Xəstələnmədən həkimə getmək niyə vacibdir? Qoruyucu həkimlik”, Dr. Tural Behbudov isə “Sağlam təbəssümün sirri olan dişlərimizi necə qoruyaq?” mövzularında məruzələrlə çıxış ediblər.
İkinci panel “Sağlamlıq mifləri və elmi həqiqətlər” mövzusuna həsr olunub. Panelə PhD. Ruqiyyə Səmədzadə və uzman Dr. Leyla İbrahimxanlı moderatorluq ediblər. Paneldə uzman Dr. İsmayıl Məhərrəmli oynaq sağlamlığı, uzman Dr. Leyla İbrahimxanlı laborator analizlərin düzgün aparılması və nəticələrə təsir edən amillər, psixoloq Aygün Ağabalayeva isə psixi sağlamlığın cəmiyyət həyatındakı rolu barədə çıxış ediblər.
Məruzələr iştirakçılar tərəfindən böyük maraqla qarşılanıb, panel iclasları geniş müzakirələr və sual-cavab sessiyaları ilə davam edib.
Qeyd edək ki, açılış tarixinin məhz iyunun 25-nə təsadüf etməsi rəmzi məna daşıyır. 26 İyun - Silahlı Qüvvələr Günü ərəfəsində fəaliyyətə başlayan Xankəndi Tibb Mərkəzi işğaldan azad olunmuş ərazilərdə həyatın bütün sahələrində bərpa və inkişaf prosesinin, o cümlədən müasir səhiyyə infrastrukturunun formalaşdırılmasının daha bir mühüm göstəricisidir.
Xankəndi Tibb Mərkəzinin fəaliyyətə başlaması Qarabağ iqtisadi rayonunda özəl səhiyyə sektorunun inkişafı, yeni iş yerlərinin yaradılması və region əhalisinin yüksəkkeyfiyyətli tibbi xidmətlərə çıxış imkanlarının genişləndirilməsi baxımından mühüm əhəmiyyət daşıyır.
Müxbir – Tahir Ağaməmmədov
Bölmənin digər xəbərləri
