Oğuzun Mollalı kəndini sel təhlükəsindən qorumaq üçün beton bənd qurulacaq - rəsmi müraciət olunub VİDEO
Oğuz, 30 iyun, AZƏRTAC
Oğuz rayonunun ərazisindən beş böyük dağ çayı – Daşağıl, Xalxal, Qalaçay, Oğuz və Türyançay keçir. Son günlər yağan güclü leysan yağışları çaylarda suyun səviyyəsini bir neçə dəfə artırıb.
AZƏRTAC-ın bölgə müxbiri xəbər verir ki, qeyd olunan çayların əksər hissəsində, xüsusən də yaşayış məntəqələrinin yerləşdiyi ərazilərdə mühafizə bəndləri qurulsa da, sel təhlükəsi qalan yerlər də az deyil. Rayonun bir sıra kəndləri dağ çaylarının axını boyu salındığından ilin müxtəlif fəsillərində daşqınlara məruz qalır. Belə yaşayış məntəqələrindən biri də aranda yerləşən Mollalı kəndidir. Maraqlıdır ki, bu kəndin həm sağ və sol tərəfindən, həm də daxilindən çay axır. Bu, bir tərəfdən sakinlərin su ehtiyacını qarşılasa da, güclü yağışlardan sonra ciddi fəsadlara yol açır. Xüsusilə kəndin Türyançay vadisi boyunca yerləşən 3 kilometrlik hissəsi hər an təhlükə mənbəyinə çevrilə bilər və son günlər bu problem özünü daha qabarıq büruzə verir.
Min nəfərə yaxın sakini, 200-dən çox təsərrüfatı olan Mollalı kəndinin ərazisindən üç çay – Türyançay, Nazarçay və Qaraçay keçir. Sakinlərin sözlərinə görə, bu çaylardan ən qorxulusu və daşqınları ilə seçiləni Türyançaydır. Çay zaman-zaman daş-çınqıl bəndləri yuyaraq sakinlərin təsərrüfatlarına ciddi ziyan vurur.
Kənd sakini Səyavuş Bayramov bildirib ki, son günlərdəki güclü leysan yağışlarından sonra Türyançayda suyun səviyyəsi bir neçə dəfə artıb, mühafizə bəndi dağılıb, kəndə sel təhlükəsi yaranıb. Onun sözlərinə görə, Türyançayda həmişə belə sellər, daşqınlar olur. “İki həftə əvvəl Oğuz Su Meliorasiya Sistemləri İstismarı İdarəsinin texnikası çayın sağ sahili boyunca eni 10 metr olan, hündürlüyü 4-5 metrə çatan qum-çınqıldan ibarət bəndlər qurmuşdu. Lakin son iki gündə yağan güclü leysanda sonra çayda suyun səviyyəsi bir neçə dəfə artıb və həmin mühafizə zolağındakı bəndləri yuyaraq aparıb”, - deyə o əlavə edib.
Sakinlər təsərrüfatlarının təhlükə altında qaldığını bildirərək, çayın kənd ərazisindən keçən hissəsində beton bəndlərin tikilməsini istəyirlər.
Məsələ ilə bağlı Oğuz Su Meliorasiya Sistemləri İstismarı İdarəsinə müraciət etdik. İdarənin baş mühəndisi Nizami Əhmədovun sözlərinə görə, ilin əvvəlindən aparılan qabaqlayıcı tədbirlər nəticəsində sel daşqınlarını müəyyən dərəcədə az zərərlə ötüşdürmək mümkün olub: "Hazırda, demək olar, bütün çaylarda texnikalarımız gücləndirilmiş iş rejimində çalışır. Mollalı kəndinin sol sahilindən axan və son illər fəallaşan Nazarçayda bu ilin 5 ayı ərzində 26 min kubmetr, Türyançayda isə 24 min kubmetr məcratənzimləmə işləri aparılıb".
Nizami Əhmədov qeyd edib ki, son illərin müşahidələrinə əsasən, sellər artıq iri qaya parçaları deyil, əsasən lil və qum qarışığı gətirir. Bu isə çay yatağının tez dolmasına və məcrada aparılan təmizləmə işlərinin effektinin azalmasına səbəb olur.
Kəndin təhlükəsizliyi üçün beton bəndlərin tikintisinə gəlincə, baş mühəndis sakinlərin və rayon rəhbərliyinin müraciəti əsasında məsələnin aidiyyəti qurumlar qarşısında qaldırıldığını diqqətə çatdırıb. "Mollalı kəndində Türyançayın mühafizəsi məqsədilə 1 kilometrlik beton bəndin qurulmasının zəruriliyi barədə rəsmi müraciətimiz olub. Yəqin ki, yaxın müddətdə layihə işlənərək onun həlli istiqamətində addımlar atılacaq”, - deyə o vurğulayıb.
İdarə rəsmisi onu da əlavə edib ki, hazırda rayonda taxıl biçini kampaniyası başladığından, diqqət həm də bu istiqamətə yönəldilib. Çaylarla yanaşı, su kanalları da təmizlənir ki, fermerlər biçin işlərini maneəsiz və rahat şəkildə həyata keçirə bilsinlər.
Müxbir - Rasim İslamoğlu
Bölmənin digər xəbərləri
