Bakı, 20 avqust, AZƏRTAC

Azərbaycan Qran-Prisinin yubiley ilində – 10-cu yarışın keçirilməsinə hazırlıqlar davam edir. Dünyanın ən böyük və irimiqyaslı beynəlxalq idman tədbirlərindən birinin təşkilində mühüm rol oynayan könüllülər də yarış həftəsonunun əsas iştirakçıları sırasında yer alacaqlar.

Bu il sentyabrın 24-dən 26-dək keçiriləcək yarışın təşkilinə təxminən 2 min könüllünün cəlb olunması nəzərdə tutulur.

2026-cı il Formula 1 Azərbaycan Qran-Prisinin könüllülük proqramı üçün də əlamətdardır. Formula 1-in Azərbaycanda keçirilməsinin 10-cu ildönümü ilə yanaşı, könüllülük proqramı da özünün yubiley Qran-Prisinə hazırlaşır. Ötən illər ərzində proqrama maraq nəzərəçarpacaq dərəcədə artıb. 2016-cı ildə qeydiyyatdan keçən namizədlərin sayı təxminən 7 min olduğu halda, bu il onların sayı rekord həddə – 49 minə çatıb. Üstəlik, bu göstərici cəmi 72 saat ərzində qeydə alınıb.

Geridə qalan müddət ərzində Bakıda keçirilən Formula 1 yarışlarının təşkilində 20 mindən çox könüllü iştirak edib. Komandanın əsas hissəsini gənclər təşkil etsə də, proqram müxtəlif yaş qruplarından olan insanları bir araya gətirir. Bu illər ərzində proqramın ən gənc iştirakçısının yaşı 16, ən yaşlı könüllünün yaşı isə 75 olub.

Proqramın inkişafında 2016-cı ildən fəaliyyət göstərən Bakı Şəhər Halqası Akademiyasının (BŞH Akademiyası) xüsusi rolu var. Akademiyanın fəaliyyəti yalnız könüllülərin yarış həftəsonunda üzərilərinə düşən vəzifələrə hazırlanması ilə məhdudlaşmır. Burada iştirakçıların şəxsi və peşəkar inkişafına da xüsusi diqqət yetirilir. Hazırlıq prosesi ixtisaslaşmış təlimləri və praktiki məşğələləri əhatə edir.

Əldə olunan bilik və təcrübə bir çox iştirakçı üçün gələcək peşəkar inkişafın əsasını təşkil edir. Son 10 il ərzində könüllü kimi fəaliyyətə başlayan 400-dən çox gənc daha sonra Bakı Şəhər Halqasının komandasına qoşulub.

Bakı Şəhər Halqası Əməliyyat Şirkətinin İnsan Resursları və İşçi Qüvvəsi Departamentinin əməkdaşı Arifə Əliyeva bildirib ki, builki nəticələr proqramın son 10 ildə keçdiyi inkişaf yolunu aydın şəkildə göstərir: “Bakı Şəhər Halqası Əməliyyat Şirkəti olaraq, bu il Formula 1 Azərbaycan Qran-Prisinin 10 illiyinə hazırlaşırıq və sentyabr ayının son həftəsi bizim üçün təqvimdə xüsusilə əlamətdar olacaq. Hazırlıq mərhələsinin mühüm etaplarından biri olan Könüllü Proqramımıza müraciətlər bu il artıq 10-cu dəfə aprel ayında açıq elan olundu və 3 günün sonunda 49 000-dən çox müraciət qəbul etdik. Dönüb geriyə baxsaq, nə qədər böyük bir yol qət etdiyimizi görərik. 2016-cı ildən bu günə qədər ümumilikdə 20 000-dən çox gənc Formula 1 Azərbaycan Qran-Prisinin təşkilinə könüllü olaraq cəlb edilib. BŞH Akademiyasının yaratdığı bu fürsətdən yararlanan və tədbirin təşkili mərhələlərində təcrübə qazanan 400-dən çox gəncimiz sonrakı illərdə işçi qüvvəsi olaraq tədbirin təşkilinə cəlb edilib. Biz insan kapitalı yaratmaqda maraqlıyıq və bu il bu rəqəmlərin daha da artacağından əminik”.

Onun sözlərinə görə, proqramın şəffaflığı və əlçatanlığı bu nəticələrin əldə olunmasının əsas səbəblərindəndir: “Hazırda BŞH Akademiyasında təlimlər mərhələsi yekunlaşmağa doğru gedir. Paralel olaraq, dünyanın müxtəlif ölkələrindən müraciət edən 1 550-yə yaxın beynəlxalq könüllünün onlayn müsahibə və təlim mərhələlərini həyata keçiririk. BŞH inklüziv bir mühit yaradıb. Hər il beynəlxalq könüllülərdən daxil olan müraciətlərin sayının artması, builki göstəricinin isə indiyədək ən yüksək həddə çatması bunu birbaşa göstərir. Könüllülərimiz fəaliyyətlərinə uniforma və akkreditasiya əməliyyatları ilə start verəcəklər. Bu il ümumilikdə 2 000-ə yaxın könüllünün Qran-Pridə iştirakı nəzərdə tutulur”.

Seyfəddin Quliyev artıq 4-cü ildir Bakı Şəhər Halqası könüllülərindən biri olaraq fəaliyyət göstərdiyini və hər il müxtəlif komandalarda təcrübə qazandığını söyləyib: “Bu mövsüm “Spectator Services” (Tamaşaçı Xidmətləri) komandasında yer almaq arzusundayam. Bu il mənimlə bərabər könüllü olacaq bütün dostlarıma uğurlar arzulayır, könüllülük fəaliyyətinin karyeramıza nə qədər faydalı olduğunu anlamalarını istəyirəm”.

Murad Ağazadə isə artıq ikinci dəfədir Formula 1 yarışlarına könüllü kimi seçildiyini vurğulayıb: “Keçən il ilk təcrübəm idi və “Sportinq” (İdman Əməliyyatları) komandasında fəaliyyət göstərirdim. Bu müddətdə yeni dostluqlar, tanışlıqlar və zəngin təcrübə qazandım. Bizim işimiz əsasən marşallarla bağlı idi. Yəni logistika komandası olaraq onlara lazım olan bütün dəstəyi təmin edirdik. Vəzifələr üzrə təlimlərdən sonra seçiləcək bütün könüllü dostlarıma uğurlar arzulayıram. İnanıram ki, bu il də keçənilki kimi uğurlu və yaddaqalan keçəcək. Fərq yaradın, könüllü olun!"

Bu proqramın əsas uğurlarından biri də könüllülük fəaliyyətindən peşəkar fəaliyyətə keçid imkanlarının yaradılmasıdır. Bunun ən yaxşı nümunələrindən ikisi isə hazırda Bakı Şəhər Halqası Əməliyyat Şirkətində çalışan Röya Fərəcova və Ədalət Məmmədovdur. Onlar Formula 1 yarışlarında könüllü kimi qazandıqları təcrübənin karyera yollarına necə təsir etdiyini bölüşüblər.

“2024-cü ildə Bakı Şəhər Halqası Əməliyyat Şirkəti tərifindən təşkil olunmuş Formula 1 yarışında könüllü fəaliyyət göstərmişəm. Könüllülük fəaliyyətim boyunca komanda ilə işləmək, insanlarla daha yaxından ünsiyyət qurmaq, tədbir zamanı yaranan situasiyalara operativ yanaşma bacarıqlarımı daha da inkişaf etdirmişəm və bu, hazırda BŞH-də əməkdaş kimi fəaliyyət göstərməyimə öz töhfəsini verib. Bununla yanaşı, mən digər beynəlxalq tədbirlərdə də öz fəaliyyətimi davam etdirmişəm və bu sahəyə olan marağım daha da artıb. Hazırda da Azərbaycan Qran-Prisinin təşkil olunmasına öz töhfələrimi verirəm. Proqramımıza qoşulan bütün könüllülərə uğurlar arzulayıram!", - deyə R.Fərəcova qeyd edib.

Ə.Məmmədov isə 2023-cü və 2024-cü illərdə Formula 1 yarışlarında və Bakı Şəhər Halqası Əməliyyat Şirkəti tərəfindən təşkil olunmuş digər əhəmiyyətli tədbirlərdə könüllü kimi fəaliyyət göstərdiyini diqqətə çatdırıb: “Əlavə olaraq, BŞH Akademiyasında 2025-ci ildə ofis könüllüsü kimi fəaliyyət göstərdim və hazırda işçi qüvvəsi üzrə komanda üzvü kimi çalışıram. Düşünürəm ki, könüllülük təcrübəm mənim həyatıma çox şey qatdı. Korporativ mühitə adaptasiya olmağı, komanda ilə birlikdə işləmək bacarığını və məsuliyyətli olmağı öyrətdi. Buradan bütün könüllülərimizə onların gələcək karyeralarında uğurlar arzulayıram!"