4 kanoeçimiz Dünya Kubokunun əsas finalında
Bakı, 7 may (AZƏRTAC). Polşanın Poznan şəhərində kayak və kanoe üzrə Dünya Kubokunun I mərhələsinə start verilmişdir. Üç gün davam edəcək yarışda Azərbaycanı 6 kanoeçi və 4 kayakçı təmsil edir.
Azərbaycan Milli Avarçəkmə Federasiyasının mətbuat xidmətindən AZƏRTAC-a verilən xəbərə görə, ilk yarış günündə 4 kanoeçimiz - Valentin Demyanenko, Andrey Kraytor və Sergey Bezuqlıy-Maksim Prokopenko dueti 3 məsafəyə yürüşdə əsas finala (Final A) vəsiqə qazanmışlar. Demyanenko və Kraytor 1 nəfərlik qayıqla 500 metr, Bezuqlıy-Prokopenko dueti isə 2 nəfərlik qayıqla 1000 metr və 500 metr məsafələrə yürüşdə həlledici yürüşün iştirakçılarına çevriliblər. Başqa sözlə, onların 4 medal qazanmaq imkanı var. Amma bu, hələ son deyil. Mayın 7-də Demyanenko və Kraytoru C-1 kateqoriyalı qayıqla, Bezuqlıy-Prokopenko duetini isə C-2 kateqoriyalı qayıqla 200 metr məsafəyə yürüşlər gözləyir.
Valentin Demyanenko və Andrey Kraytor əvvəlcə 1 nəfərlik kanoe qayığı ilə 500 metr məsafəyə seçmə mərhələ yürüşlərinə qatılmışdır. Onlar ayrı-ayrı yarımqruplarda çıxış etmişlər. Demyanenko bu məsafəni 1 dəqiqə 51,744 saniyəyə qət edərək 1-ci yerə sahib olmuşdur. O, birbaşa əsas finala yüksəlmişdir. Kraytor isə 1 dəqiqə 55,700 saniyə ilə 5-ci yeri tutmuş və yarımfinala çıxmışdır. Yarımfinalda isə Kraytor 1 dəqiqə 54,138 saniyə nəticə göstərərək, 2-ci yerə yiyələnərək və karyerasında ilk dəfə Dünya Kubokunun əsas finalına yüksəlmişdir. Bu isə o deməkdir ki, mayın 8-də keçiriləcək C-1 kateqoriyalı qayıqla əsas final yürüşündə 9 iştirakçıdan 2-si Azərbaycan təmsilçisi olacaq. 2 nəfərlik kanoe qayığı ilə 1000 metr məsafəyə yürüşdə Sergey Bezuqlıy-Maksim Prokopenko dueti seçmə mərhələyə uğurla start götürmüşdür. Onlar 3 dəqiqə 41,017 saniyə nəticə ilə 2-ci yeri tutaraq, birbaşa əsas finala yüksəlmişlər. Bu məsafəyə həlledici yürüş mayın 7-də olacaq. 2 nəfərlik kanoe qayığı ilə 500 metr məsafəyə yürüşə də Sergey Bezuqlıy-Maksim Prokopenko dueti uğurla başlayıb. Onlar bu məsafəni 1 dəqiqə 45,598 saniyəyə qət edərək, öz yarımqruplarında 3-cü yeri tutublar və birbaşa əsas finala yüksəlmişdir. Həlledici mərhələ yürüşü mayın 8-də keçiriləcək.
1 nəfərlik kanoe qayığı ilə 1000 metr məsafəyə yürüş edən 2 kanoeçimiz - Adnan Əliyev və Boqdan Kurudz da qüvvəsini sınayıb. Əliyev seçmə mərhələdə öz yarımqrupunda 4 dəqiqə 14,622 saniyə nəticə ilə 8 iştirakçı arasında sonuncu olaraq mübarizəni dayandırmışdır. Kurudz isə öz yarımqrupunda 4 dəqiqə 22,028 saniyə nəticə ilə 6-cı yeri tutduğu üçün yarımfinala çıxmışdır. Yarımfinal mərhələsində Kurudz 4 dəqiqə 6,745 saniyə nəticə ilə 7-ci yeri tutmuşdur. Bu isə kanoeçimizin mükafatlar uğrunda mübarizə aparması üçün yetərli olmamışdır. Kurudz ən yaxşı halda 10-cu ola bilər. Bunun üçün mayın 7-də keçiriləcək B finalında (10-18-ci yerlər) 1-ci yeri tutmaq lazımdır. Adnan Əliyevlə Boqdan Kurudz mayın 8-də 1 nəfərlik qayıqla 5000 metr məsafəyə yürüşə də qatılacaqlar.
Qadın kayakçımız Natalya Fiklisova 500 metr məsafəyə 1 nəfərlik qayıqla seçmə yürüşdə 2 dəqiqə 2,086 saniyə nəticə ilə öz yarımqrupunda 9 iştirakçı arasında 8-ci yeri tutmuşdur. Qaydalara əsasən, ilk pillənin sahibi birbaşa əsas finala, 2-7-ci yerləri tutanlar isə yarımfinala çıxmışdır. Yəni, Fiklisova bu məsafəyə yürüşdə mübarizəni erkən dayandırmışdır. Amma onu mayın 7-də 1 nəfərlik qayıqla 200 metr məsafəyə yürüş də gözləyir.
1 nəfərlik kayak qayığı ilə mübarizə aparan Mirnazim Cavadov 500 metr məsafəyə seçmə mərhələ yürüşündə çıxış etmişdir. Cavadov ilk dəfə qatıldığı Dünya Kubokunun I mərhələsində bu məsafəni 1 dəqiqə 46,363 saniyəyə 5-ci pillədə qət etmişdir. Bununla da 19 yaşlı idmançımız növbəti mərhələyə vəsiqə qazanmışdır. Yarımfinalda kayakçımız 1 dəqiqə 47,274 saniyə nəticə göstərərək 6-cı yeri tutmuşdur. Bu nəticə ilə Cavadov mayın 8-də keçiriləcək B finalına (10-18-ci yerlər) çıxmışdır.
2 nəfərlik kayak qayığı ilə 500 metr məsafəyə seçmə mərhələ yürüşündə Rüfət Vəlizadə-Tamerlan Mustafayev dueti də yarımfinala çıxmışdır. Onlar seçmə mərhələdə 1 dəqiqə 42,173 saniyə nəticə ilə 5-ci yeri tutublar və növbəti mərhələyə yüksəlmişlər. Yarımfinalda isə azərbaycanlı cütlük 1 dəqiqə 44,295 saniyə nəticə ilə 7-ci yeri tutmuşdur. Vəlizadə-Mustafayev dueti mayın 8-də keçiriləcək B finalında çıxış edəcək.
Qeyd edək ki, mayın 7-də Mirnazim Cavadov K-1 kateqoriyalı qayıqla, Rüfət Vəlizadə-Tamerlan Mustafayev dueti isə K-2 kateqoriyalı qayıqla 200 metr məsafəyə yürüşdə də mübarizəyə başlayacaqlar.
Bölmənin digər xəbərləri
