Müharibə və hərbi cinayətlərdən əziyyət çəkmiş Vyetnam xalqı Xocalı faciəsini daha yaxşı anlayır VİDEO
Hanoy, 26 fevral, AZƏRTAC
Müharibə və hərbi cinayətlərdən əziyyət çəkmiş Vyetnam xalqı Xocalı faciəsini daha yaxşı anlayır. Bu fikir Azərbaycanın Vyetnamdakı səfirliyinin Xocalı soyqırımının 23-cü ildönümü ilə əlaqədar paytaxt Hanoyda “Xocalı. Soyqırımı və insanlığa qarşı cinayətlər. Cəzasızlığın təntənəsi” mövzusunda keçirdiyi konfransda səslənib.
Tədbirdə Vyetnam ədliyyə nazirinin müavini, Hanoy Hüquq Universitetinin rektoru Phan Chi Hieu, Vyetnam parlamentinin müdafiə və təhlükəsizlik komitəsinin sədr müavini Tran Dinh Nha, Vyetnam Elmlər Akademiyasının vitse-prezidenti Pham Van Duc, Xarici İşlər Nazirliyinin, Kommunist Partiyasının rəsmiləri, nüfuzlu ali təhsil ocaqlarının tədqiqatçıları və tələbələri, diplomatlar və jurnalistlər iştirak ediblər.
Qonaqlar əvvəlcə “Xocalıya ədalət!” beynəlxalq təbliğat kampaniyası çərçivəsində çap olunan poster, buklet və kitablardan ibarət sərgi, habelə hadisəni əks etdirən fotostendlə tanış olublar.
Azərbaycanın Vyetnamdakı səfiri Anar İmanov 1992-ci il fevralın 25-dən 26-na keçən gecə Ermənistan silahlı qüvvələrinin Xocalının dinc əhalisini xüsusi qəddarlıqla qətlə yetirdiyini, əsir götürülən insanların dəhşətli işgəncə, zülm və təhqirlərə məruz qaldığını diqqətə çatdırıb. O, Xocalıda baş vermiş bu cinayət əməlinə görə Ermənistan dövlətinin, xüsusilə də cinayətin birbaşa təşkilatçıları olmuş Ermənistanın hazırkı rəhbərliyinin məsuliyyət daşıdığını vurğulayıb, soyqırımı əməlini çoxlu sayda müstəqil mənbələrin, xüsusilə beynəlxalq mətbuatda dərc olunan materialların və hadisə şahidlərinin ifadələrinin sübuta yetirdiyini söyləyib.
Xocalı soyqırımının beynəlxalq ictimaiyyət tərəfindən qınanmalı, bu cinayət hadisəsinə lazımi siyasi və hüquq qiymət verilməli olduğunun vacibliyini vurğulayan A.İmanov əks halda bunun cəzasızlığın təntənəsi olduğunu və dünyanın bir sıra başqa regionlarında da oxşar cinayət hadisələrinin törədilməsinə zəmin yaratdığını diqqətə çatdırıb.
Sonra Xocalı soyqırımından bəhs edən video nümayiş etdirilib, tədbir iştirakçıları faciə qurbanlarının xatirəsini bir dəqiqəlik sükutla yad ediblər.
Konfransda, həmçinin Vyetnam parlamentinin müdafiə və təhlükəsizlik komitəsinin sədr müavini Tran Dinh Nha, Türkiyənin Vyetnamdakı səfiri Ahmet Akif Oktay, Azərbaycan Universitetlərinin Vyetnamlı Məzunları Cəmiyyətinin rəhbəri Nghiem Vu Khai, Hanoy Hüquq Universitetinin beynəlxalq hüquq fakültəsinin dekan müavini xanım Nguyen Kim Ngan, Vyetnam İnsan Hüquqları İnstitutunun direktor müavini xanım Dao Thi Minh Huong, Hanoy Universitetinin tələbəsi, “Mən Azərbaycan haqqında nə bilirəm” inşa müsabiqəsinin qalibi Phuong Thao Tran Thi çıxış ediblər. Natiqlər Xocalıda baş vermiş qətliamın insanlığa qarşı cinayət olduğunu söyləyib və bu əməli törədənlərin məsuliyyətə cəlb olunması üçün beynəlxalq ictimaiyyət tərəfindən ədalətli mövqeyin nümayiş etdirilməsinin vacibliyini vurğulayıblar.
Qeyd olunub ki, uzun illər müharibələrdən əziyyət çəkmiş, soyqırımı və hərbi cinayətlərlə üzləşmiş Vyetnam xalqının Xocalı faciəsini daha yaxşı anladığını və bu cinayəti pislədiyini bildiriblər.
Konfrans çərçivəsində Xocalı soyqırımı haqqında Vyetnam dilində çap olunmuş kitabın və internet səhifəsinin təqdimatı keçirilib. Kitab və saytda Xocalı soyqırımının tarixi, faciə barədə müstəqil mənbələrə istinadlar, beynəlxalq mediada dərc olunmuş materiallar, hadisə şahidlərinin ifadələri, soyqırımı qurbanları barədə məhkəmə-tibbi ekspertizanın rəyləri, faciəni əks etdirən şəkillər əksini tapıb.
Səfir Anar İmanov sonda konfrans iştirakçılarının Dağlıq Qarabağ münaqişəsi, Xocalı soyqırımı mövzularında suallarını cavablandırıb.
Şahin Cəfərov
AZƏRTAC-ın xüsusi müxbiri
Hanoy
Bölmənin digər xəbərləri
