İDMAN
Dünya Kubokunda gimnastlarımız beş finalda oynamaq hüququ qazanıblar [YENİLƏNİB] VİDEO
Marina Nekrasova sərbəst hərəkətlərdə də finala vəsiqə qazanıb. Onun təsnifatın yekunları üzrə topladığı 12,550 bal yeddinci yerdə qərarlaşaraq finala yüksəlməsini təmin edib. Daha bir idmançımız Yuliya İnşina isə finalda üçüncü ehtiyat gimnast olub.
Bu təsnifat üzrə ən yaxşı nəticəni (13.800 bal) braziliyalı Flavia Lopes Sarayva göstərib.
17:00
Azərbaycanlı gimnast Oleq Stepko Dünya Kubokunda dayaqla tullanma, paralel qollardan sonra, turnikdə hərəkətlərdə də adını finala yazdırıb. O, bu kateqoriyada təsnifatın yekunları üzrə 13,950 bal toplayaraq yeddinci olub.
Təsnifatda birinci-ikinci yerləri 14,650 balla türkiyəli Ümid Şamiloğlu və yaponiyalı Tomomasa Xaseqava bölüşüblər.
16:52
Oleq Stepko paralel qollar üzərində hərəkətlərdə də finalda oynamaq hüququ qazanıb. O, 15,700 bal toplayaraq təsnifatda birinci yeri tutub.
Yaponiya və Türkiyənin hər birindən iki idmançı, İspaniya, İsrail və Belçikadan isə bir gimnast finala yüksəliblər.
15:45
Azərbaycanlı gimnast Marina Nekrasova Bakıda keçirilən idman gimnastikası üzrə Dünya Kubokunun ikinci günündə 13,100 bal toplayaraq finala yüksəlib.
Təsnifatda ən yüksək nəticəni 15,150 bal toplamış 16 yaşlı braziliyalı Flavia Lopes Sarayva göstərib. Nəticələrə əsasən, Özbəkistanın iki təmsilçisi, İsveç, Türkiyə, Macarıstan və Almaniya gimnastları da finala çıxıblar.
X X X
15:26
Azərbaycan təmsilçisi Oleq Stepko dayaqla tullanma hərəkətlərində Dünya Kubokunun finalına vəsiqə qazanıb. O, təsnifatda iki cəhddən sonra 14,325 bal toplayaraq kanadalı idmançı Skott Morqan ilə birlikdə 3-4-cü yerləri bölüşüb.
Təsnifatda 14,850 bal toplamış yaponiyalı Kenzo Şirai birinci olub.
X X X
12:46
Bakı, 20 fevral, Samirə Allahverdiyeva, Həsrət Mahmudova, AZƏRTAC
Fevralın 20-də idman gimnastikası üzrə Dünya “Challenge” Kuboku yarışlarının ikinci gününə start verilib.
AZƏRTAC xəbər verir ki, Azərbaycanda ilk dəfə təşkil olunan bu mötəbər turnir birinci Avropa Oyunlarında gimnastikanın altı növü üzrə yarışlara ev sahibliyi etmiş Milli Gimnastika Arenasında keçirilir.
Kubok yarışlarında 19 ölkədən 146 iştirakçı gücünü sınayır. Yarışlarda ayrı-ayrı alətlər üzrə medallar uğrunda 46 kişi və 22 qadın gimnast mübarizə aparır.
Dünya Kuboku yarışlarına kişilər arasında dayaqla tullanma, qadınlar arasında isə gimnastika tiri yarışlarına start verilib. Daha sonra isə kişilər paralel qollar, turnik, qadınlar isə sərbəst hərəkətlərlə mübarizəni davam etdirəcəklər.
Kişi gimnastlardan üçqat dünya çempionu Kenzo Siray (Yaponiya), gimnastika atı üzərində hərəkətlərdə dünya çempionatının bürünc medalçısı Kaya Kazuma (Yaponiya), Olimpiya Oyunlarının ikiqat gümüş medalçısı Marsel Nquyen (Almaniya), xalça üzərində sərbəst hərəkətlər üzrə Avropa çempionu Aleksandr Şatilov (İsrail) və digərləri çıxış edirlər.
Bu mötəbər idman tədbirinin tanınmış qadın gimnastları isə Olimpiya, dünya və Avropa çempionu Oksana Çusovitina (Özbəkistan), yeniyetmələrin Yay Olimpiya Oyunlarında sərbəst hərəkətlər üzrə çempion Flavia Lopes Sarayva (Braziliya) və dünya kuboklarının üçqat qızıl medalçısı Dorina Bötsoqödür (Macarıstan).
Favoritlər arasında paralel qollar üzrə dünya üçüncüsü, “Bakı-2015” ilk Avropa Oyunlarında beş medala layiq görülmüş Azərbaycan idmançısı Oleq Stepko və komanda hesabında onunla birgə bürünc mükafat qazanmış Petro Paxnyuk da yer alır.
Azərbaycanı yarışlarda zərif cinsin nümayəndələrindən idman gimnastikası üzrə Dünya “Challenge” Kubokunun gümüş medalçısı Kristina Pravdina, Marina Nekrasova, Yuliya İnşina və Mariya Smirnova təmsil edirlər.
Yarışların ilk iki günündə kişi və qadın gimnastlar arasında kubokun təsnifat mərhələləri, sonuncu günündə isə ayrı-ayrı alətlər üzrə final mərhələləri keçiriləcək.
Tamaşaçıların yarışlardan daha çox zövq almaları üçün turnir boyunca müxtəlif müsabiqələr və əyləncə xarakterli fləşmoblar da təşkil olunur.