Münaqişə zonalarında sülhün bərqərar edilməsi prosesində qadınların rolu VİDEO
Bakı, 26 aprel, AZƏRTAC
Aprelin 26-da Bakı Konqres Mərkəzində BMT Sivilizasiyalar Alyansının VII Qlobal Forumu çərçivəsində “Münaqişə zonalarında sülhün bərqərar edilməsi prosesində qadınların rolu” mövzusunda bölmə iclası keçirilib.
AZƏRTAC xəbər verir ki, tədbirdə BMT baş katibinin müavini və Afrika üzrə xüsusi məsləhətçisi Maged A.Abdelaziz Afrikadakı münaqişələrdən, bu hadisələrin yaranma səbəblərindən bəhs edib. O, münaqişənin həlli ilə bağlı Afrika təcrübəsini bölüşüb və təhlillər aparıb. Qeyd olunub ki, Afrikada 1 milyarda yaxın insan yaşayır. Qızlar və qadınlar Afrika əhalisinin təqribən yarısını təşkil edir. Onlar müxtəlif etnik qruplara aiddirlər. Qadınların sülhün bərqərar edilməsi prosesində rolu və münaqişələrin həlli uğrunda göstərilən səylər daha da gücləndirilməlidir.
Azərbaycan Respublikası Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Dağlıq Qarabağ münaqişəsinin nəticəsindən danışaraq deyib: “Ermənistanın təcavüzü nəticəsində Azərbaycan ərazisinin 20 faizi işğal olunub, bir milyondan çox əhali qaçqın və məcburi köçkünə çevrilib. Biz təcavüzdən əziyyət çəkən ölkə kimi münaqişələrin qarşısını almaq, insanların pozulmuş hüquqlarının bərpası üçün göstərilən səyləri tam dəstəkləyirik. Biz BMT Təhlükəsizlik Şurasının 1325 saylı Qətnaməsinin qəbul olunmasını müsbət bir addım kimi qiymətləndiririk”.
Komitə sədri qeyd edib ki, Ermənistan təcavüzkar siyasətini davam etdirir. Ermənistan qoşunların təmas xəttinə yaxın yaşayış məntəqələrimizi atəşə tutur. Atəşkəsin tez-tez pozulması nəticəsində mülki əhali mənəvi və maddi ziyana məruz qalır. Aprelin əvvəllərində erməni tərəfinin təxribatı günahsız vətəndaşlarımızın, o cümlədən qadınların və uşaqların ölümü ilə nəticələnib. Xeyli sayda ev, məktəb dağılıb. Beynəlxalq birlik təcavüzkara təzyiq göstərmir. Bu isə onun daha da azğınlaşmasına səbəb olur. Ermənistan BMT Təhlükəsizlik Şurasının məlum qətnamələrinin tələblərini yerinə yetirmir. Azərbaycan müharibə istəmir. Biz münaqişənin sülh yolu ilə ədalətli həllinin tərəfdarıyıq.
Nigeriyanın Demokratiya və İnkişaf Mərkəzinin təsisçisi və sədri, professor İbrahim Gambari bildirib ki, münaqişələrin həllində qadınların fəal iştirakı təmin olunmalıdır. Onlar sülhün bərqərar olunmasında əhəmiyyətli rol oynaya bilərlər.
Afrikada qadınlarla bağlı layihələrin icraçısı xanım Anna Furmarola bildirib ki, münaqişə zonalarında sülhün bərqərar edilməsi prosesində qadınların rolunu təmin etmək üçün yerli QHT-lər və təşkilatlarla əməkdaşlıq edirik. BMT-nin Təhlükəsizlik Şurasının qətnamələrinin əhəmiyyətini vurğulayan A.Furmarola bu sənədlərdə bir sıra boşluqların müəyyənləşdirildiyini diqqətə çatdırıb və bu istiqamətdə öz tövsiyələrini verib.
Ölkəsində yaşanan münaqişələrdən danışan Mali şəhərinin meri xanım Ouman Sall Seek silahlı toqquşmalar zamanı qadınların və uşaqların böyük problem yaşadıqlarını bildirib. Qeyd edilib ki, qadınların sülh prosesində iştirakı münaqişələrin həllində mühüm rol oynaya bilər.
Sonda mövzu ilə bağlı müzakirələr aparılıb, suallar cavablandırılıb.
Bölmənin digər xəbərləri
