Azərbaycan Milli Kulinariya Mərkəzi 25 yaşını qeyd edib VİDEO
Bakı, 4 may, Z.Mansurova, A.İsmayılova, AZƏRTAC
Mayın 4-də “Sərin” restoranında Mədəniyyət və Turizm Nazirliyinin, Azərbaycan Milli Kulinariya Mərkəzinin (AMKM), Azərbaycan Milli Kulinariya Assosiasiyasının (AMKA) birgə təşkilatçılığı ilə AMKM-in 25 illiyinə həsr edilmiş tədbir keçirilib. Tədbirdə hökumət rəsmiləri, Azərbaycanda fəaliyyət göstərən diplomatik korpus təmsilçiləri, mədəniyyət, ədəbiyyat, incəsənət xadimləri, ictimaiyyət nümayəndələri, həmçinin respublikamızın bölgələrindən gəlmiş qonaqlar, tanınmış kulinarlar iştirak ediblər.
AZƏRTAC xəbər verir ki, tədbir iştirakçıları əvvəlcə foyedə mərkəzin 25 illiyi münasibətilə kulinariya məmulatları və Azərbaycan Rəssamlar İttifaqının təqdim etdiyi rəsm sərgisi ilə tanış olublar.
Mərasimdə mədəniyyət və turizm naziri Əbülfəs Qarayev çıxış edərək Azərbaycan mətbəxinin qədim tarixindən söhbət açıb. O deyib: “Azərbaycan mədəniyyəti daşıyıcılarının bədnam qonşularımız tərəfindən təzyiqlərə məruz qalması heç kimə sirr deyil. Bədnam qonşularımız nəinki torpaqlarımıza, hətta mədəniyyətimizə də təcavüz edirlər. Azərbaycan mətbəxi də bu proseslərdən kənarda qalmayıb. Keçən il Ermənistan bütün Şərqdə istifadə olunan lavaşı mənimsəmək istəyib. Onlar lavaşın qeyri-mədəni irs kimi UNESCO-nun siyahısına daxil edilməsi üçün müraciət ediblər. Bu, təcavüz deyilmi?! Ona görə də Azərbaycan tərəfi digər dövlətlərin mədəniyyət xadimləri və diplomatları ilə birlikdə lavaşın hamıya məxsus olması barədə sübutlar təqdim edib. Azərbaycan mətbəxsiz təsəvvür edilə bilməz!” Nazir hazırda türk dünyasına məxsus olan dolmanın bişirilmə ənənələrinin UNESCO-nun siyahısına daxil edilməsi üçün fayllar hazırlandığını bildirib.
Ə.Qarayev Azərbaycanın birinci xanımı, Heydər Əliyev Fondunun prezidenti, UNESCO-nun və ISESCO-nun xoşməramlı səfiri Mehriban Əliyevanın AMKM-in 25 illiyi münasibətilə təbrik ünvanını bu qurumun direktoru, AMKA-nın prezidenti, UNESCO-nun Ənənəvi Qida Komitəsinin sədri, Əməkdar Mədəniyyət İşçisi Tahir Əmiraslanova təqdim edib.
Həmçinin nazir, Prezident İlham Əliyevin “Azərbaycan milli kulinariya sahəsinin əməkdaşlarına “Əməkdar Mədəniyyət İşçisi” fəxri adının verilməsi haqqında” 2016-cı il 21 aprel tarixli Sərəncamı ilə fəxri ada layiq görülmüş Tahir Əmiraslanova və Oruc Əliyevə fəxri adları, habelə Azərbaycan Milli Kulinariya Mərkəzinin əməkdaşlarına nazirlik tərəfindən “Fəxri mədəniyyət işçisi” adını, medal və diplomları təqdim edib.
Sonra T.Əmiraslanov qurumun 25 illik fəaliyyəti haqqında hesabat məruzəsi ilə çıxış edib. Bildirib ki, Milli Kulinariya Mərkəzi yarandığı gündən Azərbaycan mətbəxinin tədqiqində, əhalinin kulinariya sahəsində maarifləndirilməsində, kulinariya mədəniyyəti və təcrübəsinin yayılmasında, milli mətbəx nümunələrinin toplanması, dünya miqyasında tanıdılması və təbliği istiqamətlərində mühüm işlər görüb. Mərkəz bu illər ərzində 100-dən çox ölkənin kulinariya təşkilatının üzvlüyünə qəbul edilib, Ümumdünya Kulinariya Təşkilatının rəhbərliyində isə təmsil olunub. Azərbaycan Milli Kulinariya Mərkəzinin komandası beynəlxalq müsabiqə, yarış və festivallardan qızıl, gümüş, bürünc medallar, habelə Dünya Kulinariya Kubokunu qazanıb. Ölkəmizdə və xaricdə 30 adda kulinariya kitabı nəşr olunub, qədim xörəklərimizin hazırlanma qaydaları bərpa edilib, ilk dəfə xörəklərin patent praktikası tətbiq olunub, “Azərbaycan mətbəxi” kitabı dünyada birinci yerə çıxıb.
T.Əmiraslanov rəhbərlik etdiyi quruma kömək edən idarə və təşkilatlara, ictimai xadimlərə minnətdarlığını bildirib.
Tədbirdə Əməkdar Elm Xadimi, Azərbaycan Aşıqlar Birliyinin sədri Məhərrəm Qasımlı, Yusif Ələkbərov və başqaları kulinarları təbrik edib, onlara uğurlar arzulayıblar.
Mərasimdə kulinarların öz məhsullarını milli paltarda təqdim etməsi, xalqımıza məxsus rəngarəng məişət əşyaları, həsir və xalçaların düzülməsi, habelə incəsənət ustalarının maraqlı çıxışı tədbirə bayram əhval-ruhiyyəsi qatıb.
Sonda AMKM və AMKA-nın öz üzvlərinə və ayrı-ayrı idarə və təşkilatlara ünvanlanmış Fəxri diplomları təqdim olunub. Diplom alanlar sırasında AZƏRTAC-ın adı birincilər sırasında olub.
Bölmənin digər xəbərləri
