ELM VƏ TƏHSİL


Əqli Mülkiyyət Agentliyində sahibkarlar üçün təlim kurslarının ilkin mərhələsi keçirilib

Bakı, 21iyun, AZƏRTAC 

Prezident İlham Əliyevin sahibkarlıq fəaliyyətinin inkişafına göstərdiyi yüksək diqqətin nəticəsidir ki, ölkəmizdə orta və kiçik bizneslə məşğul olan hüquqi və fiziki şəxslərin, eləcə də iri sahibkarlıq subyektlərinin fəaliyyətinə yaradılan maneələr aradan qaldırılıb, o cümlədən sahibkarlara məxsus əmtəə nişanlarının qeydiyyata alınması ilə bağlı prosedurların təkmilləşdirilməsi və iddiaçı məmnunluğunun təmin edilməsi istiqamətində məqsədyönlü tədbirlərin həyata keçirilməsinə başlanılıb. Azərbaycan Respublikasının Əqli Mülkiyyət Agentliyinin İdarə Heyətinin sədri Kamran İmanov Sahibkarlar (İşəgötürənlər) Təşkilatları Milli Konfederasiyası rəhbərliyinin müraciətini nəzərə alaraq, Konfederasiyanın səlahiyyətli nümayəndələri ilə görüşüb və sahibkarları maraqlandıran məsələlər barədə müzakirələr aparıb.

Agentliyin mətbuat xidmətindən AZƏRTAC-a bildirilib ki, görüşdə, həmçinin sahibkarlar üçün ilkin mərhələdə haqqı ödənilməyən (ödənişsiz) maarifləndirici təlim kurslarının təşkili barədə razılıq əldə olunub. İkitərəfli razılaşmaya əsasən, Əqli Mülkiyyət Agentliyinin tabeliyində olan Patent və Əmtəə Nişanlarının Ekspertizası Mərkəzində sahibkarlar üçün “Sənaye mülkiyyəti obyektlərindən istifadənin hüquqi tənzimlənməsi” mövzusunda təlim kurslarının ilkin mərhələsi təşkil olunub. Ödənişsiz təlim kurslarında özəl sektordan 50 nəfərədək dinləyici iştirak edib.

Əqli Mülkiyyət Agentliyinin İdarə Heyətinin üzvü Sənan Tapdıqov, Patent və Əmtəə Nişanlarının Ekspertizası Mərkəzinin direktoru Xudayət Həsənli bu tədbirin sahibkarlar üçün faydalı olacağını vurğulayıb, təlim iştirakçılarına uğurlar arzulayıblar.

İkigünlük təlimdə “Əqli mülkiyyət hüquqlarının təminatında məhkəmə praktikası”, “Sənaye mülkiyyəti obyektlərinin mühafizəsinin hüquqi təminatı”, “Milli qanunvericiliyə uyğun olaraq əmtəə nişanlarının qeydiyyatı üçün təqdim edilmiş iddia sənədlərinin ekspertizası, qeydiyyat haqqında qərarın qəbulu, iddia sənədi barədə məlumatların dərci və qeydiyyatın qüvvədəolma müddəti”, “Əmtəə nişanlarının beynəlxalq qeydiyyatı (Madrid sazişi)”, “Sənaye nümunələrinin hüquqi mühafizəsi”, “Sənaye nümunələrinin beynəlxalq təsnifatı (Lokarno sazişi)”, “Coğrafi göstəricilərin hüquqi mühafizəsi: milli və beynəlxalq qanunvericiliyin tətbiqi istiqamətləri” mövzularında məruzələr dinlənilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.