Əqli Mülkiyyət Agentliyinin benefisiarı olduğu tvinninq layihəsi yekunlaşıb
Bakı, 29 oktyabr, AZƏRTAC
Azərbaycan Respublikası Əqli Mülkiyyət Agentliyinin benefisiarı olduğu və Avropa İttifaqının (Aİ) maliyyələşdirdiyi “Rəqəmli şəbəkələrdə əqli mülkiyyət hüquqlarının idarə olunması və qorunması məqsədilə Əqli Mülkiyyət Agentliyinin institusional potensialının gücləndirilməsi” adlı tvinninq layihəsinin başa çatması ilə əlaqədar tədbir keçirilib.
Əqli Mülkiyyət Agentliyindən AZƏRTAC-a bildirilib ki, İdarə Heyətinin üzvü, sədr müavini Sənan Tapdıqov layihənin keçirildiyi dövrdə xalqımız üçün əhəmiyyətli hadisələrin baş verdiyini və Müzəffər Ali Baş Komandan, Prezident İlham Əliyevin rəhbərliyi ilə torpaqlarımızın işğaldan azad olunduğunu qeyd edib və bu yaxınlarda xalqımızın Zəfər Gününün birinci ildönümünü keçirəcəyini diqqətə çatdırıb. O, ölkəmizdə əqli mülkiyyət hüquqlarının qorunmasında xarici ölkələrlə əməkdaşlığın əhəmiyyətinə toxunaraq tvinninq layihəsi çərçivəsində Aİ-nin ekspertlərinin iştirakı ilə beynəlxalq təcrübənin öyrənilməsinin buna bariz nümunə olduğunu bildirib.
Avropa İttifaqının ölkəmizdəki nümayəndəliyinin rəhbəri Peter Mixalko layihənin uğurla başa çatması münasibətilə Azərbaycan hökumətini və Əqli Mülkiyyət Agentliyini təbrik edib. Yunanıstanın Azərbaycandakı səfiri Nikolaos Piperiqkos layihənin həyata keçirilməsində Yunanıstan Müəllif Hüquqları Təşkilatının rolunu vurğulayıb, gələcək tvinninq layihələrinin keçirilməsi təklifini irəli sürüb.
Hibrid formatda keçirilən tədbirin iştirakçıları, eləcə də onlayn rejimdə qoşulan Aİ-nin ekspertləri layihənin komponentləri haqqında ətraflı məlumat verib, öz təəssüratlarını bölüşüblər.
Bölmənin digər xəbərləri
