REGİONLAR
Əsgər anası: Böyük Qələbəmizə az qalıb
Kürdəmir, 5 noyabr, AZƏRTAC
Ermənistan ordusu dinc insanları, o cümlədən uşaqları, anaları qadağan olunan dəhşətli silahlarla qətlə yetirir, şəhər və kəndlərimizi dağıdır. Bu azmış kimi, indi də fosforlu mərmilərdən istifadə edir, meşələrimizi yandırır, ekoloji terror törədirlər. Dünyanın aparıcı dövlətləri isə ermənilərin bu vəhşiliyinə göz yumurlar. Bəs, erməni analar hara baxır?! Axı, onların övladları başqa torpaqda vuruşur, özü də qətlə yetirilirlər.
Bu sözləri AZƏRTAC-ın bölgə müxbirinə Kürdəmir rayonunun Sığırlı kəndindən olan əsgər anası Əsli Tarverdiyeva söyləyib. Onun oğlu Əli cəbhədə düşmənə qarşı döyüşür. Prezident, Ali Baş Komandan İlham Əliyevin rəhbərliyi ilə şanlı Azərbaycan Ordusunun qələbə xəbərlərindən hədsiz sevinc hissi keçirdiyini söyləyən əsgər anası bu döyüşlərdə oğlunun da iştirak etməsindən qürur duyduğunu bildirib. "Mən də övladı düşmənə qarşı döyüşən minlərlə anadan biriyəm. Artıq ordumuz düşməni tamamilə susdurmaq üzrədir. Böyük Qələbəmizə az qalıb. O günü səbirsizliklə gözləyirik. Allah haqq-ədalət yolunda döyüşən hər bir əsgərimizi qorusun", - deyə əsgər anası söyləyib.