Dadbilmə və iybilmənin itməsi COVID-19 xəstəliyinin spesifik əlaməti hesab olunur
Bakı, 21 avqust, AZƏRTAC
COVID-19 xəstəliyinin əlamətləri mütəmadi olaraq Ümumdünya Səhiyyə Təşkilatı və Amerikanın Xəstəliklərin Kontrol Mərkəzi tərəfindən müşahidələrə əsasən tez-tez dəyişdirilir. Amma bu gün ən çox rast gəlinən əlamətlər qızdırma, quru öskürək və halsızlıqdır. Bu üç əlamət COVID-19-dan şübhələnməyə əsas verir. İkinci sırada mədə-bağırsaq ağrıları, ürəkbulanma, qaytarma, əzələ ağrıları, iştahsızlıq, baş və boğaz ağrıları kimi şikayətlər yer alır.
AZƏRTAC xəbər verir ki, bu barədə Nazirlər Kabineti yanında Operativ Qərargahın avqustun 21-də keçirdiyi mətbuat konfransında Mərkəzi Neftçilər Xəstəxanasının həkim-infeksionisti Fərrux Sədirov məlumat verib.
Onun dediyinə görə, xəstəliyin spesifik əlamətlərindən danışarkən dadbilmə və iybilmənin birdən-birə itməsi daha çox müşahidə edilir: “Hətta bir sıra ölkələrdə həmin əlamətləri olan xəstələrin birbaşa COVID-19 xəstəsi kimi qəbul edilməsini məsləhət görürlər. Digər respirator xəstəliklərdə xroniki burun və alın ciblərinin iltihabı olan və qrip xəstəliyində də dadbilmə və iybilmənin dəyişilməsi ola bilər, amma tamamilə itməsi COVID-19-un xüsusi əlamətidir. Ona görə də həmin əlamətləri hiss edən kimi mütləq həkimə müraciət edilməsi məsləhət görülür”.
Bölmənin digər xəbərləri
