Futbol üzrə dünya çempionatında ilk het-trik: Kriştiano Ronaldo
Bakı, 16 iyun, AZƏRTAC
Futbol üzrə XXI dünya çempionatında ilk het-trik iyunun 15-də Portuqaliya-İspaniya oyununda qeydə alınıb.
AZƏRTAC xəbər verir ki, Portuqaliya millisinin hücumçusu Kriştiano Ronaldo 3:3 hesabı ilə başa çatan matçda komandasının hər üç qoluna imza ataraq het-trik edib.
Portuqaliyalı ulduz futbolçu matçın 4-cü dəqiqəsində 11 metrlik cərimə zərbəsindən fərqlənib. Hesab 1:1 olarkən Kriştiano Ronaldo uzaq məsafədən qüvvətli zərbə ilə dublunu rəsmiləşdirilib.
Kriştiano Ronaldo het-trikə matçın 88-ci dəqiqəsində nail olub. O, cərimə zərbəsindən topu uzaq doqquzluğa göndərərək üçüncü qolunu vurub və komandasını məğlubiyyətdən xilas edib.
Qeyd edək ki, Kriştiano Ronaldo 2006-cı, 2010-cu və 2014-cü illərdə iştirak etdiyi üç mundialın hər birində bir dəfə fərqlənə bilib. Beləliklə, portuqaliyalı forvard əvvəlki üç dünya çempionatında göstərdiyi nəticəyə "Rusiya 2018"də ilk oyunda nail olub.
Bölmənin digər xəbərləri
