Habip Asan: Azərbaycanda əqli mülkiyyət sisteminin optimal idarəetmə institutu formalaşıb
Bakı, 25 iyul, AZƏRTAC
Ümumdünya Əqli Mülkiyyət Təşkilatının (ÜƏMT) Keçid və İnkişaf Etmiş Dövlətlər departamentinin (TDC) direktoru Habip Asan Azərbaycan Respublikasının Əqli Mülkiyyət Agentliyinin İdarə Heyətinin sədri Kamran İmanovla görüşündə bildirib ki, Azərbaycanda əqli mülkiyyət sisteminin optimal idarəetmə institutu formalaşıb.
Bu barədə AZƏRTAC-a Əqli Mülkiyyət Agentliyindən məlumat verilib. Görüş bu günlərdə İsveçrənin Cenevrə şəhərində keçirilən ÜƏMT-nin 63-cü Baş Assambleyasının iclasları çərçivəsində onlayn rejimdə baş tutub.
Azərbaycan Respublikasının Prezidenti İlham Əliyevin səyləri sayəsində ölkədə həyata keçirilən islahatlar siyasəti nəticəsində əqli mülkiyyət sahəsində baş verən institusional dəyişikliklər barədə K.İmanovun ətraflı məlumatını dinləyən H.Asan qeyd edib ki, ölkəmizin əqli mülkiyyət sisteminin idarəçiliyinin yeni strukturunun yaradılması barədə məlumatlı idi, lakin hazırkı görüş ona daha aydın təsəvvürlər yaratmaq imkanı verdi. Azərbaycanın mövcud idarəetmə institutu funksionallıq baxımından düzgün qərarlar qəbul etmək üçün optimaldır və bir çox ölkədə həyata keçirilməsinə çalışılan seçimdir.
O, həmçinin vurğulayıb ki, K.İmanovun idarəçilik təcrübəsi əqli mülkiyyət institutunun fəaliyyətinə önəmli fayda verəcək.
Baş verən institusional dəyişikliklərin mahiyyətini açan K.İmanov bildirib ki, burada əsas məqam əqli mülkiyyət sahəsində çalışan təşkilatları bir araya gətirmək, bu strukturların birgə fəaliyyət göstərməsini təmin etmək və bununla onların işinə yeni impuls verməkdir. Bu, yeni iqtisadi nəzəriyyə - neoinstitualizmə uyğun olaraq, tranzaksiyaların (istehsal prosesində itkilərin) aradan qaldırılmasına nail olmağa imkanlar yaradır.
Bununla yanaşı, Agentliyin rəhbəri vurğulayıb ki, belə idarəetmənin nəticəsi həm səlahiyyətlərin, eyni vaxtda, məsuliyyətin artmasıdır.
Əqli mülkiyyət institutunun perspektivlərindən danışan K.İmanov qeyd edib ki, ÜƏMT-nin da bəyan etdiyi kimi, əqli mülkiyyətin rolu, onun təsiri müasir dövrdə hər bir sahəyə sirayət edirsə, əqli mülkiyyət texnologiyalarla uzlaşmalı, onlara qarşı çıxmamalı, əksinə, uyğunlaşaraq, yeni nailiyyətlərin əldə olunmasına gətirməlidir. “Azərbaycanda belə bir fikir formalaşıb ki, əqli mülkiyyət özlüyündə yalnız hüquqların qorunmasına dair rəsmi sənədlərin verilməsi işi ilə bitmir. Bura digər məsələlər də daxildir: bir tərəfdən, əqli mülkiyyətin iqtisadiyyatı, digər tərəfdən - sosioloji məsələlər. Yəni üçlük olaraq hüquq, iqtisadiyyat və sosial aspekt birgə nəzərə alınmalıdırlar. Bu, əqli mülkiyyətin mahiyyətini ifadə edən və ondan doğan fəlsəfi yanaşma və praktiki tələbdir”, - deyə Kamran İmanov bildirib.
Məhz bu səbəbdən bütün qorunan əqli mülkiyyət obyektləri Azərbaycanda vahid dövlət müəssisəsində cəmləşib, onun idarəçiliyinə verilib. Bu, o cümlədən dövlət siyasəti kimi müəyyən stimullaşdırıcı addımların atılmasını asanlaşdırır. Məsələn, ixtiraçılara yardım göstərmək məqsədilə dövlət PCT sistemi üzrə ödəmələrin 50 faizini öz üzərinə götürüb. K.İmanovun sözlərinə görə, bu böyük və vacib məsələdir.
Agentliyin strukturu barədə danışarkən, K. İmanov xüsusi olaraq yeni yaradılan Texnologiyaların Kommersiyalaşdırılması və Transferi Mərkəzinin məqsədini qeyd edib: patent analitikası vasitəsilə ən yaxşı patentləri seçib, onlara maliyyə vəsaiti ayırmaqla kommersiyalaşdırmaq, innovasiyaya çevirmək.
Bununla əlaqədar H.Asan deyib ki, ÜƏMT bu məsələyə çox önəm verir və Azərbaycana bu işləri reallaşdırmaq üçün lazım olunan dəstək göstəriləcək.
Görüşdə, həmçinin Əqli Mülkiyyət Agentliyinin treninq mərkəzi bazasında ÜƏMT Akademiyasının filialının yaradılması, Azərbaycanın ənənəvi biliklər və ənənəvi mədəni ifadələr (folklor) sahəsində qanunvericilik təcrübəsinin təşviqi, Azərbaycanın coğrafi göstəricilərinin qeydiyyatı və qorunması, birgə milli və regional tədbirlərin, o cümlədən əqli mülkiyyət və innovasiyalı iqtisadiyyat, Azərbaycanın patent qanunvericiliyinin təkmilləşdirilməsi, süni intellekt və əqli mülkiyyətin perspektivinin müzakirəsinə həsr ediləcək seminarların keçirilməsi müzakirə edildi.
H.Asan bildirib ki, direktoru olduğu TDC bu məsələləri müntəzəm olaraq təqib edəcək və qısa zaman ərzində həyata keçirməyə hazırdır.
K.İmanov TDC departamentinin yeni rəhbəri kimi qardaş Türkiyənin təmsilçisi olan H.Asana işində uğurlar arzulayıb.
Bölmənin digər xəbərləri
