MƏDƏNİYYƏT


Məmməd Əmin Rəsulzadə və onun “Azərbaycan şairi Nizami” əsəri mövzusunda dəyirmi masa

Bakı, 16 aprel, AZƏRTAC

Aprelin 15-də Xəzər Universitetinin "Xəzər”in ədəbiyyat səyyahları” ədəbi-fəlsəfi məclisi Lənkəran Peşə Liseyinin müəllim və tələbə heyəti ilə birgə “Məmməd Əmin Rəsulzadə və onun “Azərbaycan şairi Nizami” əsəri” mövzusunda onlayn dəyirmi masa keçirib.

AZƏRTAC xəbər verir ki, tədbir Prezident İlham Əliyevin 5 yanvar 2021-ci il tarixli Azərbaycan Respublikasında 2021-ci ilin "Nizami Gəncəvi İli” elan edilməsi haqqında Sərəncamına uyğun olaraq təşkil edilib.

Universitetin dillər və ədəbiyyatlar departamentinin müəllimi Qardaşxan Əzizxanlı “Azərbaycan şairi Nizami” kitabında Nizaminin hissiyyat, düşüncə cəhətdən bir Azərbaycan şairi olmasının arqument və dəlillərlə sübut edildiyinə diqqət çəkib. Tədqiqat müəllifinin Nizaminin yaşadığı zaman və şəraitdə dilin milli mənsubiyyəti bildirmək mənasında önəm daşımadığını göstərdiyini bildirib.

Böyük istiqlal carçısının nəvəsi Rais Rəsulzadə M.Ə.Rəsulzadənin müstəqil Azərbaycan uğrunda etdiyi mücadilədən, babasının keçdiyi şərəfli həyat yolundan danışıb, böyük istiqlalçı tərəfindən səpilən toxumların bu gün öz bəhrəsini verdiyini və bundan sonsuz fərəh duyduğunu söyləyib, tədbirin təşkilatçılarına minnətdarlıq ifadə edib.

Azərbaycan Xalq Cümhuriyyəti dövrünü tədqiq edən Ramil Əhməd M.Ə.Rəsulzadənin elə İstanbulda yazmış olduğu misilsiz əsərinin ruhundan söz açaraq, Nizaminin Azərbaycan şairi kimi tanıdılmasında bu tədqiqatın əvəzsiz rolu olduğunu dilə gətirib.

Filologiya üzrə fəlsəfə doktoru dosent Xatirə Yusifova hələ tələbə olarkən bu əsərdən referat yazdığını, bu cür tədqiqatların təbliğinin onların özü qədər faydalı olduğunu deyərək, həm Nizami, həm də Rəsulzadə irsinə müraciət olunması anlamında tədbiri ikiqat bayram adlandırıb. Bildirib ki, əsərdə bol-bol işlənən arxaik türkizmləri Məmməd Əmin Nizaminin öz millətinə olan sevgisi kimi əsaslandırıb.

Xəzər Universitetinin dillər və ədəbiyyatlar departamentinin müdiri dosent Dilbər Zeynalova M.Ə.Rəsulzadənin ədəbi-tənqidi görüşlərinin və “Azərbaycan şairi Nizami” əsərinin tədrisindən danışaraq, onun böyük siyasət adamı olması ilə bərabər ustad ədəbiyyatşünas olduğunu vurğulayıb. Şair ruhlu yenilməz insanın “Mayıs duyğuları” şeirini özünəməxsus intonasiya ilə tədbir iştirakçılarına çatdırıb.

Lənkəran Peşə Liseyinin direktoru Afər Kərimov öz çıxışında mövzu ətrafında danışmaqla yanaşı, Azərbaycanın dövlət və ictimai xadimi M.Ə.Rəsulzadənin idarəetmə modellərindən istifadə etməsi baxımından heç vaxt unudulmayacaq güclü menecment olduğunu söyləyib. Peşə Liseyinin müəllimlərindən Sevda Ağayeva, Etibar Nəhmətli Məmməd Əmin irsinin xüsusən də, gənclər tərəfindən öyrənilməsinin əhəmiyyətindən söz açıblar.

İqtisadiyyat və menecment fakültəsinin tələbələri Şahin Əliyev, Elvin Məmmədsalahov və Tayfun Mirzəyevin “Azərbaycan şairi Nizami” əsəri ilə bağlı təqdimatları, Təbiət elmləri və mühəndislik fakültəsinin tələbələri Şəfa Yusifova və Neyjən Sultanovanın çıxışları maraqla qarşılanıb.

Tədbirin sonunda nizamişünaslığa böyük töhfə olan bu misilsiz əsərin ingilis dilinə tərcümə olunması barədə təklif irəli sürülüb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.