“Riyaziyyat və onun tətbiqləri” 8-ci Beynəlxalq Avrasiya Konfransı başa çatıb
Bakı, 31 avqust, AZƏRTAC
Bakı Dövlət Universitetində bu ali təhsil ocağının 100 illik yubileyinə həsr olunan “Riyaziyyat və onun tətbiqləri” 8-ci Beynəlxalq Avrasiya Konfransının (IECMSA-2019) bağlanış mərasimi keçirilib.
BDU-dan AZƏRTAC-a bildiriblər ki, mərasimdə çıxış edən rektor Elçin Babayev dörd gün davam edən konfransın işini yüksək qiymətləndirib, bölmə iclaslarında təqdim olunan məruzələrin, aparılan elmi müzakirələrin uğurlu nəticələr verəcəyinə əminliyini vurğulayıb. Rektor gələcəkdə dünyanın tanınmış riyaziyyatçılarının iştirakı ilə BDU-nun tələbə, magistr və doktorantları üçün riyaziyyat üzrə məktəblərin təşkil olunması təklifini irəli sürüb.
Türkiyənin Sakarya Universitetinin professoru Murat Tosun Bakı Dövlət Universitetinin əsas tərəfdaşlığı və ev sahibliyi ilə keçirilən konfransın faydalı olduğunu bildirib və təqdim olunan məqalələrin toplu şəklində və indekslənən jurnallarda dərc olunacağı haqqında məlumat verib.
Sonra beynəlxalq konfransın bölmə iclaslarına rəhbərlik edən yerli və xarici alimlərin hesabatları dinlənilib.
Rektor Elçin Babayev Türkdilli Dövlətlərin Riyaziyyatçılar Cəmiyyətinin fəxri prezidenti, tanınmış alim, bacarıqlı elm təşkilatçısı Hilmi Hacısalihoğlunu Azərbaycan və Türkiyə arasında elmi əməkdaşlığın inkişafına verdiyi töhfələrə görə “BDU-nun Fəxri diplomu” ilə təltif edib.
Bakı Dövlət Universitetinin bir qrup əməkdaşı konfransın təşkilində göstərdikləri xidmətlərə görə Təşkilat Komitəsi tərəfindən sertifikata layiq görülüb.
Türkiyənin Sakarya, Beynəlxalq Balkan Universiteti, Firat Universiteti, Təkirdağ Namiq Kamal Universiteti, Kocaeli Universiteti, Amasya Universiteti, Qazi Universiteti və Türk Dünyası Riyaziyyat Cəmiyyətinin dəstəyi ilə təşkil olunan konfransda cəbr, topologiya, riyazi analiz və diferensial tənliklər, statistika, tətbiqi riyaziyyat, riyazi təhsil, diskret riyaziyyat, informasiya təhlükəsizliyi, həndəsə və riyaziyyatın digər sahələri ilə bağlı 43 ölkədən daxil olmuş 243 elmi məruzə dinlənilib.
Bölmənin digər xəbərləri
