Şəhid Turan Məmmədlinin döyüş yoldaşı: Qələbədən sonra ilk işi toy etmək olacaqdı... VİDEO
Ağstafa, 7 dekabr, Ruslan Novruzoğlu, AZƏRTAC
Şəhidlərin əziz xatirəsi, onların döyüş meydanında göstərdiyi igidliklər heç zaman unudulmayacaq. Bu xatirələr dildən-dilə gəzib dolaşacaq, Azərbaycanın müasir qəhrəmanlıq salnaməsinə çevriləcək. Adını qəlblərə daimi yazdıran şəhidlərimizdən biri də gizir Turan Məmmədlidir.
AZƏRTAC xəbər verir ki, Qarabağımızın hər bir şəhəri, hər bir kəndi şəhidlərimizin qanı, əsgərlərimizin güc və iradəsi hesabına işğaldan azad edildi. Onların hər biri bizim üçün doğmadır, əzizdir. Ağstafanın Göycəli kəndində doğulub boya-başa çatmış şəhid gizir Turan Məmmədli Vətən müharibəsində Füzulidən Cəbrayıladək döyüş yolu keçib. Turan Cəbrayıl ətrafında gedən ağır döyüşlərdə qəhrəmancasına şəhid olub. Bu gün onun ailəsini ziyarətə döyüş yoldaşları da gəlib. 44 günlük müharibədə ayağını itirən döyüş yoldaşı Nurlan Məmmədli Turanın əsl dost, vətənpərvər, gülərüz, döyüşkən ruhlu hərbçi olduğunu deyir. “Turanla bir döyüşə girdik. Onun üzündən heç zaman təbəssüm əksik olmurdu. Qələbədən sonra ilk işi toy etmək olacaqdı. Döyüşlər başlamamışdan qabaq toyunun vaxtını planlaşdırmışdı. Hər ikimizin məzuniyyəti qalmışdı. Mənə döyüşdən qabaq telefonunun kodunu dedi. Ürəyinə dammışdı şəhid olacağı...” ,- deyə Nurlan bildirir.
Şəhidin atası Raqif Məmmədov deyir ki, o, oğlanlarının hələ kiçik yaşları olandan hərbçi olmalarını arzulayıb. Onları hərbi ruhda böyüdüb: “Vətəni qorumaq, işğal altındakı torpaqları düşməndən xilas etmək hər bir valideynin şərəfidir. Əgər onun övladı döyüşürsə, bu, valideynin baş ucalığıdır. Mənim 3 oğul övladım var. Onun ikisi hərbçi olub. Biri ehtiyatda olan gizirdir”.
Onu da deyək ki, şəhid Turan Məmmədlinin həyatında 7 rəqəmi xüsusi önəm daşıyıb. Belə ki, dekabrın 7-si, yəni bu gün onun doğum günüdür. 27 yaşı olacaqdı... Oktyabrın 7-də şəhidlik zirvəsinə yüksəlib. Noyabrın 7-də isə nişanı olub. Toyunu da qələbədən sonra etməyi planlaşdırmışdı... Allah rəhmət eləsin!
Bölmənin digər xəbərləri
