ELM VƏ TƏHSİL


UNEC-də “Elm həftəsi”nə start verilib

Bakı, 21 oktyabr, AZƏRTAC

Azərbaycan Dövlət İqtisad Universitetində (UNEC) “Elm həftəsi”nə start verilib.

Universitetdən AZƏRTAC-a bildirilib ki, ilk tədbir UNEC Avropa İqtisadiyyatı Mərkəzi ilə təşkil olunub.

Rektor Ədalət Muradov UNEC-in tədqiqatyönümlü universitetə çevrilməsi istiqamətində görülən işlərdən söz açıb. O, UNEC-də elmi jurnalların təsis edildiyini, elmi tədqiqatların stimullaşdırılması məqsədilə tətbiq edilən differensial əməkhaqqı sistemində göstəricilərn 70 faizinin elmi fəaliyyətlə bağlı olduğunu, nüfuzlu elmi jurnallarda dərc olunan məqalələrə görə 4 min manatadək qonorarın təyin edildiyini bildirib. Ədalət Muradov UNEC-də müəllimlərin iki qrupa - pedaqoji fəaliyyətlə məşğul olan müəllimlərə və tədqiqatçı müəllimlərə ayrıldığını diqqətə çatdırıb. Tədqiqatçı müəllimlərin əməkhaqqının digərlərinə nisbətən 50 faiz artacağını vurğulayıb. UNEC-də müxtəlif elmi tədqiqat istiqamətləri üzrə ixtisaslaşmış tədqiqat mərkəzlərinin yaradıldığından söz açan rektor əsas məqsədin tədqiqat potensialı olan şəxsləri aşkarlamaq, eyni zamanda, xaricdə yaşayan azərbaycanlı alimləri UNEC-də aparılan tədqiqatlara cəlb etmək olduğunu deyib.

Rektor bildirib ki, belə tədqiqat mərkəzlərindən biri də UNEC Avropa İqtisadiyyatı Mərkəzidir. Mərkəzin rəhbəri Almaniyanın Bochum Ruhr Universitetində tədqiqatçı, Kembric Enerji Araşdırma qrupunun üzvü, UNEC-in məzunu, doktor Elxan Riçard Sadiq-Zadədir.

Sonra Elxan Riçard Sadiq-Zadə “Avropa İttifaqının ətraf mühit siyasəti, qazlaşdırma və qlobal Cənubla iqtisadi əlaqələrin rolu” mövzusunda çıxış edib. Qərbi Avropada ətraf mühit probleminin yaranma səbəblərini açıqlayan məruzəçi sənayeləşmə və qlobal iqlim dəyişməsini əsas faktorlar kimi göstərib. Alim problemin inkişaf etmiş və inkişaf etməkdə olan ölkələrə təsirini riyazi və iqtisadi modellər əsasında təhlil edib. Bildirib ki, qlobal dəyişiklik daha çox inkişaf etməkdə olan tropik ölkələrə təsir edəcək. Məruzədə alternativ və bərpa olunan enerji mənbələrinə görə iqlim dəyişikliyinin tempinin sürətləndiyi, bunun isə emissiyaların azalmasına gətirib çıxaracağı qeyd olunub, inkişaf etməkdə olan ölkələrin az karbonlu iqtisadiyyata keçmələrinin vacibliyi vurğulanıb. Çıxışda Avropa ətraf mühit siyasətinin prioritetləri, eyni zamanda, Avropa İttifaqında yeraltı enerji mənbələrindən yenidən emal enerji növlərinə keçidin fiskal aspektləri açıqlanıb.

O, təbii qazın emissiyasından, Azərbaycanın təşəbbüskarı olduğu Cənub Qaz Dəhlizi layihəsinin əhəmiyyətindən söz açıb. Bildirib ki, Balkan ölkələrinin qazlaşdırılması məhz həmin layihəyə əsasən aparılacaq.

Təqdimatdan sonra iştirakçıların ekologiya ilə iqtisadiyyatın qarşılıqlı əlaqələri, “Holland sindromu”nun iqtisadiyyata təsiri, elektromobillik, elektrik enerjisinin tətbiqinin artırılmasının ətraf mühitə təsiri və digər sualları cavablandırılıb. Bildirilib ki, BMT-nin hesabatına əsasən, iqlim dəyişikliyi ümumi daxili məhsula 5-10 faiz arasında təsir edir. “Holland sindromu”nun iqtisadiyyata təsirini cavablandıran məruzəçi bu amilin qlobal miqyasda az, lokal miqyasda isə böyük təsirinin olduğunu qeyd edib. Elxan Riçard Sadiq-Zadə dünyada alternativ enerji mənbələri kimi külək və günəş enerjisindən istifadənin genişləndirildiyini, gələcəkdə elektromobilin tətbiqinin daha geniş miqyas alacağını deyib.

Tədbirdə çıxış edən akademik Ramiz Məmmədov son dövrlər Azərbaycanda iqlim dəyişikliyinə diqqət çəkərək ölkədə 60 faiz quraqlığın müşahidə olunduğunu bildirib. Azərbaycanda su təhlükəsizliyinin qlobal miqyasda başlıca problemlərdən biri olduğunu vurğulayan akademik su ehtiyatlarının və yeni su mənbələrinin artırılması istiqamətində məqsədyönlü tədbirlərin həyata keçirildiyini diqqətə çatdırıb.

Rektor Ədalət Muradov mövzu ilə bağlı təhlillərin aparılacağını və təkliflər paketinin hazırlanacağını bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.