YAP Səbail rayon təşkilatının yaranmasının 29-cu ildönümü qeyd olunub VİDEO
Bakı, 21 fevral, AZƏRTAC
Fevralın 21-də YAP Səbail rayon təşkilatının yaranmasının 29-cu ildönümünə həsr olunmuş tədbir keçirilib.
AZƏRTAC xəbər verir ki, tədbirdə əvvəlcə Azərbaycan Respublikasının Dövlət Himni səsləndirilib. Sonra ulu öndər Heydər Əliyevin və Azərbaycanın ərazi bütövlüyü uğrunda canlarından keçmiş şəhidlərimizin əziz xatirəsi 1 dəqiqəlik sükutla yad edilib.
Tədbiri açan Yeni Azərbaycan Partiyasının (YAP) Səbail rayon təşkilatının sədri Muxtar Nağıyev partiyanın yaranma tarixindən, onun yarandığı dövrdə Azərbaycandakı böhranlı vəziyyətdən danışıb. Qeyd edib ki, belə bir vəziyyətdə Azərbaycan ziyalıları buna göz yuma bilməyiblər və ulu öndər Heydər Əliyevə müraciət ediblər.
YAP Səbail rayon təşkilatının sədri partiyanın yarandığı ilk dövrdən keçdiyi çətin və keşməkeşli yoldan bəhs edərək deyib ulu öndər Heydər Əliyevin xalq, dövlət üçün gördüyü işlər göz qabağındadır. “Ümummilli lider Heydər Əliyev elə bir dövrdə hakimiyyətə gəlmişdi ki, Azərbaycanda sosial-iqtisadi vəziyyət çox ağır idi. Belə bir şəraitdə xilaskarlıq missiyasını öz üzərinə ancaq xalqını sevən bir lider götürə bilərdi. Ulu Öndər hakimiyyətə gəldikdən sonra Azərbaycanda bir çox islahatlar həyata keçirildi. Heydər Əliyevin qətiyyəti, qüdrəti Azərbaycanı parçalamaqdan qurtardı, Azərbaycan gəncliyinin inkişafı istiqamətində çox böyük işlər görüldü. 44 günlük Vətən müharibəsindəki Zəfərimizin təməli ulu öndər Heydər Əliyev tərəfindən qoyulub”, - deyə o qeyd edib.
Ailə, Qadın və Uşaq Problemləri üzrə Dövlət Komitəsinin sədri Bahar Muradova çıxışında bildirib: “YAP Azərbaycanda və regionda yeganə partiyadır ki, müstəqilliyinə nail olmaq istədiyi dövlətin uğrunda çox çətin yollardan keçib”.
Bahar Muradova deyib ki, bizim milli-mənəvi ailə dəyərlərimiz ən başlıca prioritetlərimizdəndir. YAP ilk olaraq azərbaycançılıq, dövlətçilik ideyasını reallaşdırmağı qarşıya məqsəd qoydu. YAP-ın digər partiyalardan fərqi ondan ibarətdir ki, bu partiya məhz bu prinsiplər üzrə fəaliyyətini davam etdirir. YAP təkcə yeni Azərbaycan dövlətini qurmadı, həmçinin yeni Azərbaycan insanını yaratdı.
Daha sonra tədbirdə çıxış edən 91-lərin nümayəndəsi Şahlar Əsgərov YAP Səbail rayon təşkilatının yaranmasının 29-cu ildönümü münasibətilə təbriklərini çatdırıb. Şahlar Əsgərov Azərbaycanda gənclər siyasətinin hazırda uğurla həyata keçirildiyini və bundan daha səmərəli istifadə olunmasının zəruriliyini vurğulayıb.
Milli Məclisin deputatı Nigar Arpadarai və digər çıxış edənlər bu gün Azərbaycan gəncliyinin formalaşdırılmasında Yeni Azərbaycan Partiyasının mühüm rolu olduğunu bildirib, partiyanın qazandığı uğurlardan bəhs ediblər.
Sonda Azərbaycan Milli Kitabxanasının direktoru, professor Kərim Tahirovun 70 illik yubileyi münasibətilə YAP Səbail rayon təşkilatının Fəxri fərmanı ilə təltif edilib.
Bölmənin digər xəbərləri
