İsveçdə seçkilərdə azərbaycanəsilli namizədlərin sayı artıb
Stokholm, 4 sentyabr, AZƏRTAC
İsveçdə keçiriləcək ümumi seçkilər ərəfəsində bu ölkənin siyasi partiyalarından namizədliyini irəli sürən daha iki azərbaycanəsilli namizədin olduğu məlum olub.
AZƏRTAC xəbər verir ki, namizədlər arasında İsveçin Mötədillər Partiyasını (Moderaterna) təmsil edən Aygün Ələkbərova və onun oğlu Rihad Ələkbərov da var.
A.Ələkbərova Elvkarlebyu kommunasının bələdiyyə şurasına namizədliyini irəli sürüb. O, yerli icmanın inkişafında və kommunanın sakinlərinin gündəlik həyatına birbaşa təsir göstərən məsələlərin həllində fəal iştirak etməyi qarşısına məqsəd qoyub.
R.Ələkbərov Evle şəhər bələdiyyə şurasına namizədliyini irəli sürüb və “Moderaterna” partiyasının namizədlər siyahısında altıncı yerdə qərarlaşıb. O, həmçinin Mötədil Koalisiya Partiyasının Gənclər Birliyinin (MUF) yerli bölməsinə rəhbərlik edir.
Onun cəmi 18 yaşı var və bu, onu qarşıdakı seçkilərin ən gənc namizədlərindən birinə çevirir. O, siyasi fəaliyyətinin əsas istiqamətlərindən birini təhsil hesab edir. Onun fikrincə, gənclərin keyfiyyətli təhsilə və gələcək inkişafları üçün əlverişli şəraitə çıxışı olmalıdır. O, gənclərin məzmunlu və faydalı asudə vaxt keçirməsi üçün imkanların genişləndirilməsini də prioritet hesab edir.
Aygün və Rihad Ələkbərovlar qeyd edirlər ki, onlar üçün təkcə İsveç cəmiyyətinin inkişafına töhfə vermək deyil, həm də Azərbaycan kökləri ilə əlaqəni qoruyub saxlamaq vacibdir. Onlar öz mənşələri ilə fəxr etdiklərini və zəruri hallarda Azərbaycan haqqında məlumat çatdırmaq və tarixi vətənləri ilə bağlı mövqeləri təmsil etmək üçün ictimai və siyasi fəaliyyətlərdən istifadə etmək niyyətində olduqlarını vurğulayırlar.
AZƏRTAC daha əvvəl İsveçin Sosial-Demokrat Fəhlə Partiyasını, Mərkəz Partiyasını və Yaşıllar Partiyasını təmsil edən digər azərbaycanəsilli namizədlərin də qarşıdakı seçkilərdə iştirak edəcəyini xəbər vermişdi.
Xatırladaq ki, sentyabrın 13-də İsveçdə ümumi seçkilər keçiriləcək. Seçkilər zamanı Riksdaqın 349 deputatı, habelə 21 regional və 290 bələdiyyə şurasının üzvləri seçiləcək.
Bölmənin digər xəbərləri
