“Caspian Energy Club” və “Enermus” QSC-nin birgə təşkilatçılığı ilə “Yaşıl dünya naminə həmrəylik ili”, “Əsrin müqaviləsi”nin 30 illiyi və “Caspian Energy” brendinin 25-ci ildönümünə həsr olunmuş tədbirlər çərçivəsində 12-ci Beynəlxalq “Caspian Energy Forum” keçirilib.

Bu barədə “Caspian Energy Club”ın sədri və qrupun baş icraçı direktoru Telman Əliyev məlumat verib.

“Caspian İnvestment Week” çərçivəsində keçirilmiş forum “Green Energy Transition”; “Əsrin müqaviləsi”nin 30 illiyi – iki dövrün arasında dayanıqlı keçidin təmin olunması; Azərbaycanda istehsal olunan yaşıl enerjinin Avropaya dayanıqlı nəqli; Orta Dəhliz üzərində yerləşən ölkələrin yaşıl iqtisadiyyata keçidi; “Yaşıl Qarabağ”; COP29-un çağırışları və Azərbaycanda keçirilməsinin regional əhəmiyyəti; regionda yaşıl layihələrə investisiyaların cəlb edilməsi, dövlət və özəl sektorlarda həyata keçirilən yaşıl layihələrin və sözügedən sektorda əməkdaşlıq kimi mövzuları əhatə edib.

Açılış nitqi ilə çıxış edən Telman Əliyev 1-ci Beynəlxalq “Caspian Gas Industry Forum” və 12-ci Beynəlxalq “Caspian Energy Forum”un rəsmi tərəfdaşları olan Ekologiya və Təbii Sərvətlər Nazirliyi, Energetika Nazirliyi və Fövqəladə Hallar Nazirliyinə foruma göstərdikləri dəstəyə görə dərin minnətdarlığını bildirib və əməkdaşlığın daha da inkişaf edəcəyini vurğulayıb.

“Fürsətdən istifadə edərək, ekologiya və təbii sərvətlər nazirinin müavini Umayra Tağıyevaya, energetika nazirinin müavini Orxan Zeynalova, COP29 Fəaliyyət Gündəliyinin Qlobal Təşəbbüslər Qrupunun Həmsədri Elmar Məmmədova 12-ci Beynəlxalq “Caspian Energy Forum”da iştiraklarına görə səmimi-qəlbdən təşəkkür edirəm. COP29-a hazırlıq kontekstində biz bərpaolunan enerjiyə keçid, enerji səmərəliliyinin artırılması üçün yeni texnologiyaların tətbiqi və s. bu kimi mövzuları müzakirə edəcəyik. Ümidvaram ki, sizin təcrübəniz və baxışlarınız qlobal iqlim dəyişikliyi məsələsində davamlı inkişafa nail olmağa kömək edəcək”, - deyə Telman Əliyev qeyd edib və əlavə edib ki, forum yaşıl enerji layihələrinin həyata keçirilməsində maraqlı olan beynəlxalq investorlar üçün işıqlandırmaq məqsədi daşıyır.

““Əsrin müqaviləsi” Ulu Öndər Heydər Əliyevin təşəbbüsü ilə imzalanıb, bu, həm energetika, həm də digər sektorların sürətli inkişafına güclü təkan verib. Xüsusilə qeyd etmək istərdim ki, çağdaş Azərbaycanın uğurları, regionların inkişafı, 30 ildən sonra Qarabağın azad edilməsi, yəni bu iqtisadi güc məhz 20 sentyabr 1994-cü ildə imzalanmış müqavilə hesabınadır. Həyata keçirilən təbii qaz və yaşıl enerji layihələri də başlanğıcını məhz bu müqavilədən götürür”, - deyə Telman Əliyev bildirib və əlavə edib ki, bu gün energetika sahəsində fəaliyyət göstərən neft-qaz şirkətləri artıq yaşıl enerjiyə keçidi elan edirlər.

“Məlumdur ki, Azərbaycan Gürcüstan və Naxçıvan-Türkiyə vasitəsilə Avropaya yaşıl enerji nəql edəcək, bu da “Əsrin müqaviləsi”nin imzalanmasının nəticəsidir. Qeyd edim ki, COP29 ölkəmizdə kiçik və orta biznes sektoruna təkan verib, KOBİA tərəfindən onlar arasında maarifləndirmə işləri aparılıb. Əminəm ki, bunun nəticəsi olaraq həmin şirkətlər iqlim dəyişmələri ilə bağlı tədbirlərin daha geniş şəkildə keçirilməsinə şərait yaradacaqlar”, - deyə Telman Əliyev çıxışında bildirib.

Daha sonra Avropa İttifaqının (Aİ) Qonşuluq və Genişlənmə üzrə Komissarı Oliver Varhelyinin 12-ci Beynəlxalq “Caspian Energy Forum”un iştirakçılarına videomüraciəti dinlənilib. Müraciətdə o, sözügedən tədbirin təkcə Cənubi Qafqaz üçün deyil, həm də Avropa və Mərkəzi Asiya üçün böyük əhəmiyyət kəsb edən bir sıra mövzuların müzakirəsi üçün mühüm platforma rolunu oynadığını bildirib.

Çıxışında Oliver Varxyeli Transxəzər dəhlizin Mərkəzi Asiyadan Avropaya malların çatdırılması üçün mühüm ticarət marşrutuna çevrildiyini qeyd edib: “Son layihələr onu göstərir ki, dəhliz boyunca ticarət həcmi 2030-cu ilə qədər üç dəfə arta bilər”.

12-ci Beynəlxalq “Caspian Energy Forum” sıralarında Xəzər-Qara dəniz və Baltik regionu ölkələrinin dövlət qurumlarının, transmilli şirkətlərin, beynəlxalq maliyyə institutlarının, aparıcı analitik mərkəzlərinin və investisiya şirkətlərinin 500-dən artıq nümayəndəsi yer alıb. Forumda energetika nazirinin müavini Orxan Zeynalov, ekologiya və təbii sərvətlər nazirinin müavini Umayra Tağıyeva, COP29 Fəaliyyət Gündəliyinin Qlobal Təşəbbüslər Qrupunun həmsədri Elmar Məmmədov fəxri qonaq qismində, Energetika Nazirliyi yanında Bərpa Olunan Enerji Mənbələri Dövlət Agentliyinin direktoru Cavid Abdullayev, SOCAR-ın vitse-prezidentinin müavini, enerji keçidi, ətraf mühit və dekarbonizasiya Teymur Quliyev, “Azəriqaz” İstehsalat Birliyinin baş direktoru Azər Məmmədov, “Masdar” şirkətinin ölkə üzrə meneceri, “Masdar Azərbaycan” MMC-nin direktoru Murad Sadıxov və “ACWA Power”in biznesin inkişafı üzrə departamentinin rəhbəri Polina Lyubomirova kimi nüfuzlu şəxslər isə spiker qismində iştirak ediblər.

Forumda moderatorluq “Caspian Energy Club”ın sədri və qrupun baş icraçı direktoru Telman Əliyev və “Uniper Global Commodities” şirkətinin Azərbaycandakı nümayəndəliyinin rəhbəri Rəşad Hüseynli tərəfindən icra edilib.

Rəsmi Tərəfdaşlar və Sponsorlar

Ekologiya və Təbii Sərvətlər Nazirliyi, Energetika Nazirliyi, Fövqəladə Hallar Nazirliyi və “Azəriqaz” İB 12-ci Beynəlxalq “Caspian Energy Forum”un rəsmi tərəfdaşları sırasında yer alıblar. Qızıl sponsor “Sensemi DMCC Dubai”, gümüş sponsorlar “Bon-Accord Engineering Supplies (Caspian) Lmt.”, “Safe Gas”, “Debet Safety”, bürünc sponsorlar isə “Zetaş Yapı”, “Via Ad Lucem”, “STP Global Cable”, VITAM və “Günəş” şirkətləridir.

“Caspian Energy Club” dünyanın 50 ölkəsindən 5000-dən çox şirkəti birləşdirən dinamik və inkişaf edən regional təşkilatdır. Biznes-hökumət dialoqunun fəal iştirakçısı olan “Caspian Energy Club”ın əsas məqsədi Azərbaycanda və “Caspian Energy Club”ın fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin B2G, B2B və B2C formatlarında dialoqların stimullaşdırılmasından və onlarda fəal iştirak etməkdən ibarətdir.

Biznes-networking üçün beynəlxalq platforma olan “Caspian Energy Club” mütəmadi olaraq müxtəlif tədbirlər təşkil edir.

Mənzil-qərargahı Bakıda yerləşən “Caspian Energy Club”ın əsas fəaliyyəti Orta Dəhliz ölkələrini əhatə edir. Klubun, həmçinin Almaniya, BƏƏ, Böyük Britaniya, Çexiya, Estoniya, Finlandiya, Gürcüstan, Qazaxıstan, Qırğızıstan, Latviya, Özbəkistan, Polşa, Türkiyədə rəsmi nümayəndəlikləri, habelə dünyanın müxtəlif ölkələrində səlahiyyətli nümayəndələri var.

“Caspian Energy Club International” 2023-cü ildə “Caspian Energy Club”ın beynəlxalq layihələrini idarə etmək məqsədilə yaradılıb. 5 il ərzində “Caspian Energy Club International” dünyanın 100 ölkəsində klubun fiziki ofislərini açmağı planlaşdırır. “Caspian Energy Club International”ın əsas öhdəliklərindən biri nümayəndələrin təyin olunmadığı ölkələrdə klubun fəaliyyətini idarə etmək, eləcə də, bütün xarici nümayəndəliklər üçün ümumi strategiyanın formalaşdırılmasıdır.

2016-cı ildə yaranan “Enermus” QSC fəaliyyət göstərdiyi müddətdə geniş təcrübə qazanıb. Fəaliyyətə başladığı gündən spesifik olan qaz təsərrüfatı sahəsi üzrə ixtisaslaşan şirkət illər keçdikcə məişət və sənaye qaz avadanlıqlarının satışından şkaf tipli Qaz Tənzimləyici Məntəqə və Pnevmatik Odorant Qurğularının yerli istehsalına keçib, 2017-ci ildə lisenziya əldə edərək qaz təsərrüfatı üzrə tikinti quraşdırma işləri və xidmətlərin göstərilməsinə başlayıb.

Şirkətin əsas fəaliyyət istiqamətlərinə qaz təchizatının layihələndirilməsi, qaz kəmərlərinin tikintisi, qaz avadanlıqlarının satışı və qaz sənayesində mühəndislik və konsaltinq xidmətləri daxildir. QSC ABŞ, İtaliya, Almaniya, Rusiya, Türkiyə kimi ölkələrin istehsal zavodlarının Azərbaycanda rəsmi nümayəndəsidir. Şirkət ISO9001, ISO14001, ISO 45001 kimi beynəlxalq sertifikatlara malikdir.