® “Coca-Cola”nın rəhbəri Türk dünyasını əhatə edən mükafata layiq görülüb
Türkiyənin paytaxtı Ankara şəhərində keçirilən “Türk sahibkar qadınlarının gücü müsabiqəsi”ndə “Azerbaijan Coca-Cola Bottlers” şirkətinin baş direktoru Rəna Məmmədova nüfuzlu mükafata layiq görülüb.
Tədbirdə əvvəlcə Azərbaycan, Özbəkistan, Qazaxıstan və Qırğızıstanın qadın sahibkarlıq təşkilatlarının rəhbərləri uğurlu fəaliyyətlərinə görə Türkdilli Dövlətlər Təşkilatı və Türkiyə Palatalar və Birjalar Birliyi (TOBB) tərəfindən mükafatlandırılıb. Bu mükafatı Azərbaycanda qadın sahibkarlığını təmsil edən Azərbaycanda Qadın Sahibkarlığının İnkişafı Assosiasiyasının (AQSİA) İdarə Heyətinin sədri Səkinə Babayeva qəbul edib.
“Azerbaijan Coca-Cola Bottlers” şirkəti isə qadınların inkişafı və məşğulluğunun artırılması sahəsində həyata keçirdiyi uğurlu fəaliyyətə görə müsabiqənin “Qadın məşğulluğunda ən çox artım göstərən şirkət” nominasiyasının qalibi seçilib.
Rəsmi mərasimdə “Azerbaijan Coca-Cola Bottlers” şirkətinin baş direktoru Rəna Məmmədovaya qadın məşğulluğunun artırılması istiqamətində həyata keçirilən davamlı layihələrə görə xüsusi mükafat təqdim olunub. Rəna Məmmədovaya mükafatı TOBB sədri Rıfat Hisarcıklıoğlu və Azərbaycan Sahibkarlar Konfederasiyasının sədri Məmməd Musayev təqdim edib.
Rəna Məmmədova şirkətin bu mükafata layiq görülməsindən öz məmnunluğunu bildirib və qadınların inkişafının şirkətin prioritetlərindən olduğunu vurğulayıb.
“Coca-Cola sistemində qadınların inkişafını dəstəkləmək bizim üçün yalnız sosial məsuliyyət deyil, həm də biznesin davamlı inkişafı üçün əsas şərtdir. Azərbaycanda qadın əməkdaşlarımızın istehsaldan tutmuş idarəetməyə qədər bütün sahələrdə daha geniş təmsil olunmasına nail olmaqdan qürur duyuruq. Bu mükafat isə gördüyümüz işin Türk dünyası səviyyəsində tanınmasıdır”, - deyə o diqqətə çatdırıb.
Qeyd edək ki, müsabiqəni Türkiyə Palatalar və Birjalar Birliyi, TOBB Qadın Sahibkarlar Şurası və Türkiyənin İqtisadi Siyasət Araşdırmaları Fondu (TEPAV) təşkil edir və türkdilli ölkələrdə qadın sahibkarlığı, həmçinin liderliyinin inkişafına töhfə verən şirkətlərin və sahibkar qadınların təltif edilməsini hədəfləyir. Bu müsabiqə Azərbaycanda Qadın Sahibkarlığının İnkişafı Assosiasiyası (AQSİA), Azərbaycan Sahibkarlar Konfederasiyası (ASK) və Kiçik və Orta Biznesin İnkişafı Agentliyinin (KOBİA) birgə əməkdaşlığı ilə elan edilib
“Azerbaijan Coca-Cola Bottlers” Türkiyənin beynəlxalq içki istehsalı şirkəti olan “Coca-Cola İçecek”in tərkib hissəsi olaraq fəaliyyət göstərir. “Anadolu Group”un bir hissəsi olan “Coca-Cola İçecek” (CCİ) 2023-cü ildən bəri ardıcıl olaraq 3 ildir ki, qadın və kişi əməkdaşları arasında bərabərliyin təmin edilməsində yüksək standartları qoruduğuna görə nüfuzlu beynəlxalq “Bərabər Əməkhaqqı Sertifikatı”na layiq görülür.
Xatırladaq ki, “Coca-Cola” 2025-ci ildə Azərbaycanda 30 illik yubileyini qeyd edir. Şirkət Azərbaycandakı fəaliyyətinə 1994-cü ildə “Azerbaijan Coca-Cola Bottlers”ın yaradılması ilə başlayıb və o vaxtdan bəri “Coca-Cola”, “Fanta”, “Sprite”, “Bonaqua”, “Cappy” və “Fuse Tea” kimi məşhur sərinləşdirici içki markalarının istehsalı və satışı ilə məşğuldur.
Bölmənin digər xəbərləri
