ABŞ-ın bu il üzrə sutkalıq neft hasilatına dair proqnoz azaldılıb
Bakı, 10 sentyabr, AZƏRTAC
Birləşmiş Ştatların cari ilə dair gündəlik xam neft istehsalına dair proqnoz azaldılıb.
AZƏRTAC ABŞ-ın Enerji İnformasiya Administrasiyasının (EIA) məlumatına istinadla xəbər verir ki, cari ildə Birləşmiş Ştatların neft hasilatının gündəlik 11,4 milyon barrel olacağı nəzərdə tutulur. Əvvəlki proqnoz isə 11,5 milyon barrel idi.
Gələn il isə ABŞ-da neft hasilatının sutkada 11,1 milyon barrelə düşəcəyi gözlənilir.
Digər tərəfdən, Meksika Körfəzində hasilatın bərpa olunmasından sonra ABŞ xam neft hasilatının bu ilin sentyabr ayında gündəlik 11,2 milyon barrel, 2021-ci ilin birinci yarısında isə 11 milyon barreldən bir qədər aşağı olacağı nəzərdə tutulur.
Qeyd edək ki, ABŞ 2018-ci ilin noyabrında Səudiyyə Ərəbistanı və Rusiyanı geridə qoyaraq dünyanın ən böyük xam neft istehsalçısı olub.
Bölmənin digər xəbərləri
