ABŞ-ın döyüş təyyarəsi və helikopteri Cənubi Çin dənizində qəzaya uğrayıb
Bakı, 27 oktyabr, AZƏRTAC
ABŞ Hərbi Dəniz Qüvvələrinə məxsus döyüş təyyarəsi və helikopter Cənubi Çin dənizi üzərində iki ayrı insident nəticəsində qəzaya uğrayıb.
AZƏRTAC xəbər verir ki, bu barədə ABŞ-ın Sakit Okean Donanması sosial mediada məlumat yayıb.
Məlumata görə, “MH-60R Sea Hawk” tipli helikopter “USS Nimitz” təyyarədaşıyan gəmisindən adi əməliyyatlar həyata keçirərkən qəzaya düşüb.
Bundan təxminən yarım saat sonra isə “F/A-18F Super Hornet” tipli döyüş təyyarəsinin qəzaya uğradığı bildirilib. Hər iki hadisə zamanı ekipaj üzvləri xilas edilib, xəsarət alan olmayıb.
Xatırladaq ki, oktyabrın 7-də Kaliforniyada tibbi helikopter qəzaya uğrayaraq Sakramento şəhərində magistral yola düşmüşdü. Sentyabr ayında isə Texasda iki mühərrikli Cessna 340 təyyarəsi qəzaya uğramış, nəticədə iki nəfər həlak olmuşdu.
Bölmənin digər xəbərləri
