ABŞ-ın maliyyə naziri Çinlə ticarət əlaqələrinin kəsilməsini istisna etməyib
Bakı, 15 aprel, AZƏRTAC
ABŞ-ın maliyyə naziri Skott Bessent idxal tariflərinin qarşılıqlı artırılması fonunda Birləşmiş Ştatlar və Çin arasında ticarət əlaqələrinin pozulacağını istisna etməyib.
AZƏRTAC xəbər verir ki, Skott Bessent bu barədə “Bloomberg TV”yə müsahibəsində deyib.
Nazir iki ölkə arasında razılaşmanın əldə edilə biləcəyini söyləsə də, Çinlə razılaşmanın digər ölkələrlə müqayisədə daha çətin olacağını vurğulayıb: “Çin həm bizim ən böyük iqtisadi, həm də ən böyük hərbi rəqibimizdir”.
Pekin ötən həftə ABŞ-dan idxal olunan məhsullara əlavə rüsumlar tətbiq etdiyini açıqlayıb. Çinin Ticarət Nazirliyi ABŞ-ın ÇXR-ə qarşı həddən artıq yüksək tariflərinin iqtisadiyyat üçün praktiki əhəmiyyət kəsb etməyən “rəqəmlər oyununa” çevrildiyini bildirib.
Bir müddət öncə ABŞ Prezidenti Donald Tramp özünün sosial media hesabında heç kimin, əsasən də Birləşmiş Ştatlara daha pis münasibət göstərən Çinin cəzasız qalmayacağını yazıb.
Qeyd edək ki, hazırda Vaşinqtonun Çindən tədarük olunan məhsullara tətbiq etdiyi rüsumlar 145 faiz təşkil edir.
Bölmənin digər xəbərləri
