ABŞ JURNALİSTLƏRİ BURAXILDILAR
Frans Press Agentliyi xəbər verir ki, şahidlərin dediklərinə görə, jurnalistləri maşınla Qəzzə şəhərindəki mehmanxanalardan birinin yanına gətirib buraxmışlar. Mehmanxana əməkdaşının sözlərinə görə, jurnalistlər yorğun görünsələr də, sağ-salamat idilər. Jurnalistlərin buraxılmasından bir qədər əvvəl məlum olmuşdur ki, onlar islamı qəbul etmişlər. Oğruların yaydıqları yeni videoyazıda girovlar yeni dinə keçmək üçün Qurandan ayələr oxuyurdular.
Foks Nyus telekanalının müxbiri Stiv Sentanni və operatoru Olaf Viq Qəzzənin mərkəzində, Fələstinin təhlükəsizlik xidmətlərinin iqamətgahı yanında oğurlanmışdı. Buna görə məsuliyyəti əvvəllər məlum olmayan “Müqəddəs cihad briqadası” öz üzərinə götürmüşdü.
Avqustun 23-də oğrular ABŞ-a ultimatum verərək, həbsxanalardakı müsəlman məhbusların 72 saat ərzində buraxılmasını tələb etmişdilər. ABŞ hökuməti bunun cavabında girovların qeyd-şərtsiz buraxılması barədə tələb irəli sürmüşdür. ABŞ-ın Qüdsdəki konsulluğunda bildirmişlər ki, Vaşinqton terrorçularla danışıqlar aparmır və onlara güzəştə getmir.
Bölmənin digər xəbərləri
