ABŞ PREZİDENTİ BAĞDADI 1956-CI İLİN BUDAPEŞTİ İLƏ MÜQAYİSƏ EDİR
Buş 1956-cı ilin oktyabrındakı qanlı antisovet üsyanından sonra Macarıstanın dramatik tarixini Səddam Hüseyn devrildikdən sonra İraq xalqının tarixindəki dövrlə müqayisə edərək bildirmişdir ki, dünənki Macarıstan bugünkü İraqda öz ruhunu görür. 1956-cı və 1989-cu illərin demokrat vətənpərvərləri kimi, iraqlılar da demokratik amallara sadiqdirlər. O demişdir ki, çox tezliklə Bağdad “bütün dünyada azadlığın mayakı kimi” Budapeşt və Vaşinqtonla bir sırada layiqli yer tutacaqdır.
Corc Buş Avropaya qısamüddətli səfərini Macarıstanda başa çatdırmaq istəyirdi. Burada isə iyunun 22-də ABŞ bayraqları 1989-cu ildəkinə nisbətən daha az dalğalanırdı. Vyanada Avstriya Kansleri Şüssel kimi, Macarıstan Prezidenti Laslo Şoyom da Amerika liderinə xatırlatmışdır ki, “terrorizmlə müharibə insan hüquqlarına və beynəlxalq qanunlara riayət olunmaqla aparılmalıdır”. Bu isə Quantanamo (Kuba) bazasındakı həbsxanada törədilən əməllərə və digər rüsvayçı hallara aşkar işarə idi.
Buş tənqidə cavab verməyərək, soyuq müharibə ilə terrorizmə qarşı müharibə arasında analoq olduğunu diqqətə çatdırmışdır. Prezident “diktaturanın devrilməsi və azad seçkilər keçirilməsi uğrunda vuruşmuş, Stalinin abidəsini dağıtmış və Moskva imperiyasına meydan oxumuş minlərlə macar tələbə və fəhləsini” xatırlamışdır. O, sözünə davam edərək demişdir: “Sovet tankları küçələrə çıxarıldı, hətta qadınlara və uşaqlara rəhm etmədi. Macar xalqının verdiyi qurbanlar bütün azadlıq mübarizlərini 50 ildən sonra da ruhlandırır”.
Amerika prezidenti “qonşu ölkələrdəki diktator rejimlərindən qaçanların hamısını qəbul edən və Qərblə sərhədi açaraq, Şərqi Avropaya ümidlər verən və dəmir pərdənin aradan qaldırılmasında xidməti olan 1989-cu il nəslini” minnətdarlıq hissi ilə xatırlamışdır. O, Macarıstanın son 17 ildə qazandığı uğurlardan da danışaraq, vurğulamışdır ki, bu nailiyyətlər İraq üçün nümunə ola bilər.
Buş amerikalılara və iraqlılara müraciət edərək, onları “1956-cı ilin hadisələrindən sonra macarlar kimi təmkinli olmağa” çağırmışdır. O demişdir: “Faşizmin və kommunizmin dəhşətlərini görən bu xalq sizin üçün nümunə olmalıdır. Azadlıq eşqi universaldır, çünki Tanrı onu kişilərin, qadınların və uşaqların qəlbinə həkk etmişdir”.
ABŞ lideri “böyük səkkizliyin” Sankt-Peterburq zirvə toplantısında iştirak etmək üçün Avropaya iyulda qayıdacaqdır. Onun Ukraynaya da səfəri gözlənir.
Bölmənin digər xəbərləri
