AZƏRTAC-ın Vaşinqtondan aldığı xəbərə görə, İraqda keçən il martın 20-də başlanmış hərbi əməliyyatlar zamanı ABŞ silahlı qüvvələrinin 916 əsgər və zabiti öldürülmüşdür. Pentaqonun yaydığı məlumatda deyilir ki, onların 680-i döyüşlərdə, qalanları isə bədbəxt hadisələr nəticəsində həlak olmuşdur. Elə həmin dövrdə döyüşlər zamanı 6 mindən çox amerikalı hərbi qulluqçu yaralanmışdır. Prezident Corc Buşun İraqda genişmiqyaslı hərbi əməliyyatların başa çatdığını elan etdiyi vaxtdan, 2003-cü il mayın 1-dən bəri orada ABŞ-ın 778 əsgər və zabiti həlak olmuşdur.
ABŞ Müdafiə Nazirliyinin məlumatında koalisiyanın üzvü olan ölkələrin itkiləri də göstərilir. Britaniya hərbçiləri 60 əsgər və zabitin həlak olduğunu açıqlayırlar. Amerikalıların məlumatına görə, İtaliya 18, İspaniya 8, Polşa 7, Bolqarıstan 6, Ukrayna 4, Slovakiya 3, Tailand 2, Niderland, Danimarka, Macarıstan, Latviya, Estoniya və Salvadorun hərəsi 1 hərbi qulluqçu itirmişdir.
