ABŞERON RAYONUNDA ÖTƏN İLİN SOSİAL-İQTİSADİ İNKİŞAFININ YEKUNLARI MÜZAKİRƏ OLUNMUŞDUR
Xırdalan, 19 fevral (AZƏRTAC). Fevralın 18-də Xırdalan mədəniyyət sarayında Abşeron Rayonu İcra Hakimiyyətinin başçısı yanında Şuranın geniş iclası keçirilmişdir. İclasda 2008-ci ilin sosial-iqtisadi inkişafına yekun vurulmuş və 2009-cu ilin vəzifələri müəyyən edilmişdir.
Tədbir iştirakçıları mədəniyyət sarayının foyesində açılmış sərgidə rayonun iri müəssisələrinin məhsullarının nümunələri ilə tanış olmuşlar. “Azbentonit”, “Avropa qapıları”, “Həsənoğlu”, “Mətanət-A”, “Abşeron zeytun” səhmdar cəmiyyətlərinin və digər müəssisələrin məhsulları xüsusi maraq doğurmuşdur. Stendlərdə rayonun kənd təsərrüfatının inkişaf dinamikası diaqramlar vasitəsilə göstərilmişdir. Yığıncaqdan əvvəl regionun hərtərəfli inkişafını və rayon icra hakimiyyətinin ötən il gördüyü işləri əks etdirən sənədli film nümayiş etdirilmişdir.
Abşeron Rayon İcra Hakimiyyətinin başçısı Zakir Fərəcov hesabat məruzəsində bildirmişdir ki, dövlətimizin başçısı İlham Əliyevin həyata keçirdiyi dəqiq və düşünülmüş siyasət sayəsində Azərbaycan regionda lider mövqeyini qoruyub saxlayır. Ötən il dünya iqtisadiyyatını bürüyən maliyyə böhranına baxmayaraq, respublikamız intensiv inkişaf edir. Azərbaycanın, o cümlədən Abşeron rayonunun dinamik inkişafından xəbər verən faktlar misal gətirilmişdir. Z.Fərəcov bildirmişdir ki, müvafiq qurumlarla birlikdə həyata keçirilən səmərəli tədbirlər əhalinin elektrik enerjisi, təbii qaz və içməli su ilə təchizatında müsbət dəyişikliklərə nail olunmasına imkan yaratmışdır. Hesabat ili ərzində rayonda yolların tikintisi və abadlaşdırılması ilə bağlı işlər görülmüşdür. Elektrik enerjisi təchizatının yaxşılaşdırılması üçün yeni transformatorlar quraşdırılmış və köhnələr təmir edilmiş, yeni elektrik xətləri çəkilmişdir. Rayonun abadlaşdırılması və yaşıllaşdırılması istiqamətində genişmiqyaslı tədbirlər həyata keçirilmişdir.
Hesabat məruzəsi Abşeron rayonunun bütün sahə və qurumlarının fəaliyyətini əhatə etmişdir. Natiq rayonda təhsil, səhiyyə və mədəniyyət müəssisələrinin maddi-texniki bazasının yaxşılaşdırılması istiqamətində görülən işlərdən danışmışdır. Təhsil sahəsində nəzərəçarpacaq uğurlar əldə olunmuşdur. 316 məzun tələbə olmuş, onların ikisi Prezident təqaüdünə layiq görülmüşdür. Azərbaycan Prezidenti İlham Əliyevin Sərəncamı ilə rayonun bir məktəbi və bir müəllim respublikada ən yaxşı elan edilmişdir.
Rayonda tikinti işləri geniş vüsət almışdır - yeni bağlar, bağçalar salınır, fəvvarələr tikilir, abidələr ucaldılır. İndi artıq təkcə Xırdalanda deyil, rayonun qəsəbələrində də yeni çoxmərtəbəli binalar tikilir.
Yığıncaqda çıxış edən rayonun bir sıra qurumlarının, müəssisələrinin və ictimai təşkilatlarının rəhbərləri bəzi məsələlərlə bağlı rəylərini söyləmiş, hesabat dövrü ərzində rayonda görülən işləri məqbul hesab etmişlər.
Yığıncaqda Azərbaycan Respublikası Przidentinin İcra Aparatının regional idarəetmə və yerli özünüidarəetmə orqanları ilə iş şöbəsinin məsul işçisi İ.Əliyev çıxış etmişdir. O demişdir ki, dinamik inkişaf edən respublikamızın iqtisadiyyatı yüksəliş dövründədir. Bütün bunlar dövlətimizin başçısı İlham Əliyevin uğurlu fəaliyyətinin, təməli ümummilli lider Heydər Əliyev tərəfindən qoyulan inkişaf strategiyasının nəticəsidir.
Natiq respublikamızın son beş ildə dinamik inkişafından xəbər verən konkret rəqəmlər və faktlar misal gətirmişdir. Ölkənin nailiyyətləri, eyni zamanda, xalqın rifahında əksini tapır. Dövlətimizin başçısı İlham Əliyevin ötən il oktyabrın 15-də keçirilən prezident seçkilərində qələbəsinin rəhni də məhz bundadır. Onu təkrar ölkə başçısı seçən xalq öz Prezidentinin siyasətini bəyəndiyini, habelə dahi liderin siyasi kursuna tərəfdar olduğunu bir daha təsdiq etmişdir.
Sonda iclas iştirakçıları adından Azərbaycan Prezidenti İlham Əliyevə müraciət qəbul edilmişdir.
Bölmənin digər xəbərləri
