Acarıstanda 200 ailə təbii fəlakət zonasından təxliyə olunub
Tbilisi, 3 aprel, AZƏRTAC
Gürcüstanın Acarıstan Muxtar Respublikası ərazisində yağan güclü qar və leysan yağışları altı bələdiyyənin ərazisində ciddi problemlər yaradıb.
AZƏRTAC xəbər verir ki, bu barədə Acarıstan hökumət administrasiyasından məlumat verilib.
Qasırğa nəticəsində evlərə və sosial obyektlərə ciddi ziyan dəyib. Bəzi bölgələrdə sel və daşqınlar, torpaq sürüşməsi nəticəsində yollar, körpülər dağılıb, yaşayış massivləri və kəndlər ilə əlaqə tam kəsilib. Təbii fəlakət zonasından 200-ə yaxın ailə təxliyə edilib.
Təbii fəlakətin vurduğu ziyanın həcmini tam müəyyən etmək hələ mümkün olmayıb. Hökumət təbii fəlakətdən əziyyət çəkən insanlara yardım məqsədilə ilkin olaraq 10 milyon lari (təxminən 6,67 milyon manat) vəsait ayırıb.
“Təbii fəlakət nəticəsində ziyan dəymiş bütün bina və evlər bərpa olunacaq, insanların hamısına yardım göstəriləcək”, - deyə hökumət administrasiyasından bildirilib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
