İQTİSADİYYAT
ADA Universiteti Bakı Yay Enerji Məktəbi layihəsini həyata keçirəcək
Bakı, 31 mart, AZƏRTAC
ADA Universitetinin İnkişaf və Diplomatiya İnstitutu, ADA Universiteti Fondu (Azərbaycan), Azərbaycan Respublikası Dövlət Neft Şirkəti (SOCAR), bp Azərbaycan, KOLİN Azərbaycan və TotalEnergies şirkətlərinin dəstəyi ilə iyulun 3-dən 14-dək 17-ci Bakı Yay Enerji Məktəbi layihəsi həyata keçiriləcək.
ADA Universitetinin mətbuat xidmətindən AZƏRTAC-a bildiriblər ki, enerji və ətraf mühit məsələlərini təhlil etmək üçün dünyanın tanınmış alim, mütəxəssis və siyasətçiləri bu iki həftəlik, ingilis dilli sertifikat proqramında bir araya gələrək, enerji diplomatiyası, hüququ və iqtisadiyyatı, neft qaz sənayesində idarəçilik, dayanıqlı inkişaf mövzularında milli, regional və qlobal perspektivə dair məsələləri ətraflı şəkildə öyrənmə imkanı əldə edirlər.
Hər il yay məktəbinə təqribən 15 ölkədən müəllim heyəti və 40 iştirakçı cəlb olunur. İlk dəfə olaraq, bu il Bakı Yay Enerji Məktəbinin ikinci hissəsi Aktau, Qazaxıstanda baş tutacaq. İştirakçılar Bakı Portundan Aktauya gəmi-bərəsi ilə səyahət edəcək və enerji məsələləri ilə bağlı Qazaxıstan perspektivi ilə də yaxından tanış olacaqlar.