ADU-da “Bakıda Avstriya ədəbiyyatı günləri” başa çatmışdır
Bakı, 18 may (AZƏRTAC). Azərbaycan Dillər Universitetində (ADU) mayın 17-də başlayan “Bakıda Avstriya ədəbiyyatı günləri” adlı ikigünlük tədbir başa çatmışdır.
ADU-nun İctimaiyyətlə əlaqələr və Mətbuat xidmətindən AZƏRTAC-a bildirmişlər ki, ADU-nun və Avstriyanın Azərbaycandakı səfirliyinin təşkilatçılığı ilə keçirilən tədbirin sonuncu günü alman dilinin leksikologiyası və üslubiyyatı kafedrasının müdiri, dosent Sevinc Rzayeva Avstriya universitetləri və ADU arasında mövcud əməkdaşlıqdan söhbət açmışdır. Avstriyanın Klagenfurt şəhərinin Alpen-Adria Universitetinin Robert Muzil adına Ədəbiyyat İnstitutunun rəhbəri, professor Klaus Amman isə “Müasir Avstriya ədəbiyyatında mənim üçün üç sevimli qadın yazarı” adlı məruzə ilə çıxış etmişdir. K.Amman məruzəsində Avstriya ədəbiyyatının inkişaf tarixinə, formalaşma mərhələlərinə və ədəbiyyatın tərəqqisinə töhfə verən yazarların həyat və yaradıcılığından danışmış, XIX-XX əsrlərdə Avstriya ədəbiyyatında köklü dönüş yarandığını tədbir iştirakçılarının diqqətinə çatdırmışdır.
Robert Muzil adına Ədəbiyyat İnstitutunun bölmə rəhbəri, professor Valter Fanta və Alpen-Adria Universitetinin professoru Maya Haderlap “Mənim dilim” məruzəsini təqdim etmişlər.
Tədbir çərçivəsində iki dövlət arasında mədəni-siyasi əlaqələrə, tərcümə məsələlərinə həsr olunmuş dəyirmi masa keçirilmişdir. Dəyirmi masada universitetlərarası əlaqələr və gələcək əməkdaşlığın perspektivləri barədə geniş fikir mübadiləsi aparılmışdır.
Bununla da ikigünlük tədbir başa çatmışdır.
######
Bölmənin digər xəbərləri
