AFFA-DA İCRAİYYƏ KOMİTƏSİNİN İCLASINDA BİR SIRA MÜHÜM MƏSƏLƏLƏR MÜZAKİRƏ OLUNMUŞDUR
AZƏRTAC xəbər verir ki, iyulun 5-də AFFA İcraiyyə Komitəsinin iclası keçirilmişdir.
İclasda çıxış edən AFFA prezidenti Rövnəq Abdullayev gündəliyə daxil olan məsələlər barədə məlumat vermişdir.
Premyer Liqada 2009-2010-cu il mövsümdən oyunların səviyyəsinin artırılması üçün çempionatın qaydalarına dəyişiklik edilməsi təklifi irəli sürülmüşdür. Bundan əlavə həmin mövsümdə çempionatda 12 komandanın çıxış etməsi təklif olunmuşdur.
Yığma komandaya istedadlı futbolçuların cəlb olunması və gənc futbolçuların oyun praktikasının itirməməsi üçün 17 yaşadək futbolçular arasında turnirin və klubların əvəzedici heyətlərinin çempionatının təşkil edilməsi gündəmdə duran məsələlərdəndir.
Eyni zamanda 2009-2010-cu il mövsümündən başlayaraq hər komandaya yalnız bir stadionda oyunlar keçirmək üçün icazə veriləcəkdir. Bu, klubların öz infrastrukturunu yaratmağa təkan verəcəkdir.
Bundan əlavə iclasda legioner limiti və legionerlərə rüsumların müəyyənləşdirilməsi barədə müzakirələr aparılmışdır.
Bölmənin digər xəbərləri
