AĞACLARI KƏSƏNLƏR CƏRİMƏLƏNMİŞDİR
Ekologiya və Təbii Sərvətlər Nazirliyi Bakı departmentinin əməkdaşları paytaxtda ağacları kəsən fiziki şəxsləri cərimələmişlər. Nazirliyin mətbuat xidmətindən AZƏRTAC-ın müxbirinə bildirmişlər ki, Sabunçu rayonunun Pirşağı qəsəbəsindəki Əjdər Məlikov küçəsində ağac kəsən fiziki şəxs Bəhruz Salmanov cərimələnmiş və vəsaiti xüsusi hesaba köçürülməsi təmin edilmişdir. Ekoloji qanunvericiliyin pozulmasına dair başqa bir fakt Xətai rayonu ərazisindəki D.Cəlilov küçəsində qeydə alınmışdır. Burada məişət xidməti obyektinin tikintisi zamanı müxtəlif növ ağaclar kəsilmişdir. Həmin fakt aktlaşdırılmış və vətəndaş Etibar Məmmədova qarşı iddia irəli sürülmüşdür. Nərimanov rayonunun M.Əlizadə küçəsindəki 917-ci məhəllədə isə “İsrafil MTK” şirkətinin həyata keçirdiyi tikinti zamanı iki qovaq ağacının kəsilməsi faktı qeydə alınmışdır. Şirkətin nümayəndəsi Yusif Nəbiyev 360 min manat məbləğində cərimələnmişdir.
Bölmənin digər xəbərləri
