AGAT fəalları beynəlxalq layihə çərçivəsində Fransaya səfər ediblər
Bakı, 13 avqust, AZƏRTAC
Azərbaycan Gənclərinin Avropaya İnteqrasiyası Təşkilatının (AGAT) fəalları Paris şəhərində Erasmus plus proqramı çərçivəsində, AGAT-ın əməkdaşlıq etdiyi AMSED şəbəkəsinin və ACD təşkilatının həyata keçirdiyi “Gənclərin incəsənət və rəqs vasitəsilə üstünlüyü olmayan gənclərin təhsilinin inkişaf etdirilməsi” adlı layihədə iştirak ediblər.
AGAT-dan AZƏRTAC-a bildiriblər ki, layihədə Azərbaycan, Türkiyə, Fransa, İsveç, Moldova və Ukraynanı təmsil edən gənclər iştirak ediblər.
Layihə çərçivəsində iştirakçı ölkələrinin mədəniyyət axşamı keçirilib. Mədəniyyət axşamında Azərbaycanı təmsil edən AGAT-çılar təşkilatın fəaliyyəti barədə təqdimat edib və ölkəmizin tarixi, mədəniyyəti, incəsənəti haqqında informasiya veriblər.
Sonra milli mətbəximizin təamları təqdim olunub.
Proqramın növbəti günlərində iştirakçılar Fransanın “ADİE” təşkilatını və Gənclərin informasiya mərkəzini ziyarət ediblər.
Növbəti günlərdə keçirilən təlimlərdə qeyri-rəsmi təhsil sistemi çərçivəsində gənclərin layihələrində istifadə edə biləcəyi metodlar müzakirə olunub.
Layihə müddətində iştirakçılar incəsənət sahəsində olan bacarıqlarını nümayiş etdirməklə müxtəlif rəqs nömrələri hazırlayıblar.
Eyni zamanda müxtəlif sessiyalarda iştirakçılar arasında layihə ideyaları müzakirə olunub. AGAT-çılar da öz növbəsində “Art in Tolerance” adlı layihə ideyasını təklif ediblər. Layihənin sonunda 6 ölkəni təmsil edən iştirakçılar 10 günlük proqram müddətində hazırladıqları rəqs nömrələrini nümayiş etdiriblər.
Bölmənin digər xəbərləri
