Ağstafada bir sinfin bütün məzunları tələbə adını qazanıb VİDEO
Ağstafa, 8 sentyabr, Ruslan Novruzoğlu, AZƏRTAC
Ağstafa şəhər Texniki-Humanitar Təmayüllü Liseyin bir sinfinin bütün məzunları ali məktəbə daxil olub. Onlar tələbə adını qazanmalarının sevinclərini illərdir əziyyətlərini çəkən, onlara təhsil verən müəllimləri ilə bölüşüblər.
AZƏRTAC xəbər verir ki, bu təhsil ocağının 11 “b” sinfinin bütün şagirdləri imtahanlarda uğur qazanaraq ali məktəblərə qəbul olublar. Belə ki, 11 “a” sinfində 16 nəfərdən 15-i, 11 “b” sinfində oxuyan 10 nəfərdən isə hamısı tələbə adını qazanıb. Tələbə adını qazanan məzunlar deyirlər ki, uğura gedən yol oxumaqdan, sinifdə sağlam rəqabətdən keçir.
“560 bal topladım. ADA Universitetinin “İnformasiya texnologiyaları” ixtisasına qəbul oldum. 8-9-cu siniflərdə artıq ixtisas seçimi etməyə başlamışdım. Müəyyən ixtisaslara marağım var idi. Onlardan biri də informasiya texnologiyaları idi. Nə qədər çətin olsa da, hər dəfə hədəfə yaxınlaşdığını hiss edəndə insan daha da həvəslənir, daha çox hədəfinə bağlanır”, - deyə Günay Sultanlı bildirib.
Tələbə adını qazanan Ayxan Abdurrəhmanov da arzusunun gerçəkləşdiyini, bunun üçün müəllimlərinə və valideynlərinə təşəkkür etdiyini deyir: “İqtisadiyyat Universitetinin sənaye mühəndisliyinə qəbul olmuşam. 354 bal topladım. Valideynlərimiz və müəllimlərimizin bizə böyük dəstəyi oldu. Bir də sinfimizdə uşaqlar arasında həmrəylik var idi. Bəzən çətin dərslərdə bir-birimizə dəstək olduq, bir yerdə çalışdıq. Bu gün sinfimizdəki bütün məzunların hamısı sevinir”.
Bütün sinfin ali məktəbə daxil olan məzunları arasında əkiz bacılar da var. Bunlar Tavat və Mehriban Qasımzadələrdir. Təhsil ocağından uzaqda yaşamalarına baxmayaraq, bu, onların uğur qazanmasına əngəl olmayıb. Əkiz bacılar 1-ci ixtisas qrupu üzrə hazırlaşsalar da, müxtəlif ali məktəblərə daxil olublar. “Uğuru qazanmaq üçün ilk olaraq qarşıda bir məqsəd olmalıdır. Özümüzü dərk etdiyimiz vaxtlardan bir məqsəd, hədəf seçməliyik. Bizim seçimimizdə uğurlu olmağımızın səbəbi bir-birimizlə çox yaxın rəftar etməyimiz və bir-birimizə kömək edərək çalışmağımız oldu”, - deyə tələbə Mehriban Qasımzadə sevincini bölüşüb.
Əkiz bacıların atası Qoca Qasımzadə isə deyir ki, liseydən nisbətən uzaqda yaşasalar da, təhsil üçün bütün əziyyətə qatlanmağa dəyər. “Bu liseydə oxumaq uşaqların öz seçimi olub. Yaxınlarımızdan burada dərs alan uşaqlar olub. Onların nəticələri yüksək olduğuna görə bizim uşaqlar da bu liseydə oxumaq istədilər. Uşaqların nəticələri həmişə yüksək olub, seçimlərinə müdaxilə etməmişik. Həmişə yanlarında olmuşuq. Onların əkiz olması aralarında rəqabəti də artırır, həm də stimul verir, çalışırlar ki, bir-birindən geri qalmasınlar”, - deyə əkizlərin atası söyləyib.
Ağstafa şəhər Texniki-Humanitar Təmayüllü Liseyin hər il kifayət qədər uğur qazanan, yüksək bal toplayan məzunları olur. Elə məktəb qapısından içəri daxil olanda lövhədəki şagirdlərin adları, topladığı ballar şagirdlərin də diqqətini çəkir ki, bu da onlara tədris ili boyunca yaxşı oxuyub nailiyyət qazanmalarına təsir edir. “2022-2023-cü tədris ilində bizim liseydə 26 şagird məzun adını qazanmışdır. Məzunlarımızdan 25 nəfər müxtəlif ali təhsil müəssisələrinə qəbul olmuşlar. Bunlardan 4 nəfər 500-dən yüksək bal toplamış, 3 nəfər 400-dən yuxarı nəticə əldə etmişlər. Mən deyərdim ki, bu şagirdlər üçün təməl düzgün qurulub. Bu təməlin nəticəsidir ki, bu şagirdlər belə uğurlar əldə ediblər”, - deyə liseyin direktoru Pərvanə Cabbarova bildirib.
Sözügedən sinfin şagirdləri hələ 9-cu sinfin buraxılış imtahanlarında da yüksək nəticələr əldə etmişdilər. Buna görə də müəllim kollektivi sinfin bütünlüklə ali məktəblərə daxil olacağına, bundan da yüksək nəticə əldə edəcəklərinə inanırdılar. Belə də oldu... İndi qalır gələcək təhsillərini uğurla tamamlamaq, karyeralarını qurub, ölkəmiz üçün dəyərli işlər görmək...
Bölmənin digər xəbərləri
