AI bəşəriyyətə təhlükəsiz və ədalətli fayda verə bilərmi?
BMT-nin Cenevrədə açılacaq sammitində bu suala cavab axtarılacaq
Bakı, 6 iyul, AZƏRTAC
Süni intellekt (AI) bütün bəşəriyyətə təhlükəsiz, ədalətli fayda verə bilərmi? Bu sualın cavabı bazar ertəsi günü, iyulun 6-da Cenevrədə açılacaq sammitdə axtarılacaq.
AZƏRTAC BMT-nin məlumatına istinadla xəbər verir ki, hökumətlər, texnologiya şirkətləri, akademiklər və vətəndaş cəmiyyəti iki gün ərzində süni intellekt idarəçiliyi üzrə Qlobal Dialoqda iştirak edəcək, yeni texnologiyanın tənzimlənməsi üçün nəzərdə tutulmuş qaydaları müzakirə edəcəklər.
BMT qeyd edir ki, süni intellektdən məsuliyyətlə istifadə olunarsa, bu yeni texnologiya bütün dünyada insanlara transformativ faydalar gətirə bilər. Bununla belə, inqilabi texnologiyanın yeni təhlükələr yaratması ilə bağlı qorxular da mövcuddur. AI ildırım sürəti ilə inkişaf etməyə davam etsə də, hökumətlər onu tənzimləmək üçün lazım olan təhlükəsizlik tədbirləri ilə ayaqlaşmaqda çətinlik çəkir.
BMT-nin xəbərlər xidməti sammit iştirakçılarından dördü ilə - Qlobal Dialoqun iki həmsədri və BMT-nin süni intellekt üzrə Müstəqil Beynəlxalq Elmi Panelinin iki həmsədri ilə söhbət aparıb. Sonuncu struktur bu yaxınlarda süni intellekt imkanları və riskləri haqqında hesabat dərc edib.
Onlar süni intellektlə bağlı faydalar, eləcə də risklər və universal qəbul edilmiş qlobal maneələrin müəyyən forması barədə razılığa gəlmək ehtiyacı barədə danışıblar.
Elmi Panelin eksperti Yoşua Bengio deyib: “Süni intellekt bir çox sahədə insan imkanlarına yaxınlaşır və ya onları üstələyir. O, həm elmi anlayışı, həm də hökumətlərin uyğunlaşma qabiliyyətini geridə qoyur. Dünyanı dəyişdirən inanılmaz irəliləyişlər olub və bu proses sürətlə davam edir.
Estoniyanın səfiri Reyn Tammsaar (Qlobal Dialoq) əlavə edib: “Dünyanın bir çox ölkəsi üçün süni intellekt əla tarazlayıcı amil ola, iqtisadi inkişafı dəstəkləyə, rəqabət qabiliyyətini artıra, elm və səhiyyə sistemlərini dəstəkləyə bilər. Ümumiyyətlə, yeni texnologiyanın tətbiqi məhsuldarlığa fayda verə bilər. Potensial məhz bundan ibarətdir”
El Salvadorun səfiri Eqriselda Lopes (Qlobal Dialoq) vurğulayıb: “Süni intellekt hökumətlərin işlərini və xidmətlərin göstərilməsini daha yaxşı təşkil etmək üçün mükəmməl vasitə ola bilər”.
Ekspertlər belə bir ortaq məxrəcə gəliblər ki, süni intellekt dünyada milyonlarla insanın faydalana biləcəyi alətdir. Eyni zamanda, əgər səhv əllərə keçərsə, o, həmçinin mənfi məqsədlər - hökumətlərə etimadı sarsıtmaq, demokratik strukturları zəiflətmək, təbliğat və informasiya bütövlüyünə zərər vurmaq üçün də istifadə edilə bilər.
Süni intellekt üzrə Müstəqil Beynəlxalq Elmi Panel dünyanın hər bir bölgəsindən fərdi şəkildə xidmət göstərən 40 mütəxəssisdən ibarətdir. Panel ilk hesabatını iyulun 1-də dərc edib.
Panelin debatları 6-7 iyul 2026-cı il tarixlərində Cenevrədə keçiriləcək və beynəlxalq ictimaiyyətin texnologiyanın idarə olunmasına beynəlxalq yanaşmaları müzakirə edəcəyi BMT-nin süni intellekt idarəçiliyi üzrə Qlobal Dialoquna əsaslanır.
Bölmənin digər xəbərləri
