AİLƏ, QADIN VƏ UŞAQ PROBLEMLƏRİ ÜZRƏ DÖVLƏT KOMİTƏSİ CƏNUB BÖLGƏSİNDƏ SEMİNAR-MÜŞAVİRƏLƏR KEÇİRMİŞDİR

28.07.2006 [14:11]
Çap et
A⁺ A^-

AZƏRTAC-ın müxbiri xəbər verir ki, Ailə, Qadın və Uşaq Problemləri üzrə Dövlət Komitəsi iyulun 26 və 27-də Lənkəran, Astara və Masallı rayonlarında “Azərbaycan Respublikasında Dövlət uşaq müəssisələrindən uşaqların ailələrə verilməsi (Deinstitusionalizasiya) və alternativ qayğı Dövlət Proqramının (2006-2015-ci illər)” həyata keçirilməsi” mövzusunda seminar-müşavirələr təşkil etmişdir.

Yerli icra strukturlarının nümayəndələrinin, bələdiyyələrin, idarə və müəssisə rəhbərlərinin iştirak etdiyi tədbirlərdə komitənin sədri Hicran Hüseynova çıxış edərək Prezident İlham Əliyevin 2006-cı il 29 mart tarixli Sərəncamı ilə təsdiq edilmiş Dövlət Proqramının məqsəd və vəzifələri, onun icrası ilə bağlı nəzərdə tutulan tədbirlər barədə iştirakçılara məlumat vermişdir.

Seminar-müşavirədə komitənin əməkdaşlarının mövzu ilə bağlı məruzələri dinlənilmişdir.

Yerli icra stukturların nümayəndələri tədbirdə çıxış edərək Dövlət Proqramının icrası ilə bağlı təkliflərini bildirmişlər.