AKROBATLARIMIZ BEYNƏLXALQ TURNİRDƏ İŞTİRAK EDƏCƏKLƏR

18.12.2003 [11:16]
Çap et
A⁺ A^-

Azərbaycanın idman akrobatikası komandası dekabrın 19-21-də Rusiyanın Oryol şəhərində Rusiyanın əməkdar məşqçisi K.Naumovanın Kuboku və Oryol Dövlət Teleradio Şirkətinin mükafatları uğrunda beynəlxalq yarışlarda iştirak edəcəkdir. Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, yarışlara qadın cütlüyü - Ayla Əhmədova və Dinara Abbasova, qadın üçlüyü - Nadejda Medvedeva, Türkan Şabanova və Dürdanə Zeynalova yola düşmüşdür. Turnir iştirakçıları arasında qarışıq akrobatlar cütlüyü Çinarə Hümbətova və Arif Cəfərov də var. Hakimlər kollegiyasında Azərbaycanı İradə Qurbanova təmsil edəcəkdir.

Beynəlxalq dərəcəli hakim Elşad Nərimanovun sözlərinə görə, akrobatlarımızın turnirdə iştirakı onların ustalığını artıracaq, məşqçilərin müxtəlif kompozisiyalar qurmaq sahəsində, təmrinlərin musiqi müşayiətinin seçilməsində təcrübə mübadiləsi aparmasına imkan verəcəkdir. O, demişdir: “Yarışlar idman akrobatikası üzrə beynəlxalq qaydalara uyğun ilkin proqramla keçiriləcəkdir. İdmançılar sürətli və tarazlı təmrinləri yerinə yetirəcək, çıxışlarını isə uyğunlaşdırılmış kompozisiya ilə yekunlaşdıracaqlar”.

Turnir gələn ilin may ayında Fransada keçiriləcək idman akrobatikası üzrə dünya çempionatına hazırlıq mərhələsi kimi nəzərdə tutulmuşdur.