Aleksandr Karelin: ABŞ-ın rusiyalı güləşçilərə viza verməməsi Dünya Kubokunun nüfuzuna xələl gətirəcək
Bakı, 30 mart, AZƏRTAC
Rusiyanın sərbəst güləş üzrə yığması aprelin 7-8-də ABŞ-ın Ayova-Siti şəhərində keçiriləcək Dünya Kuboku turnirində iştirak edə bilməyəcək. Səbəb ölkəyə giriş vizasının olmamasıdır. Rusiya Federasiyası XİN-in nümayəndəsi Mariya Zaxarova bildirib ki, ABŞ-ın Moskvadakı səfirliyi 14 idmançı və 4 məşqçidən ibarət nümayəndə heyəti ilə müsahibənin təşkilindən imtina edib.
AZƏRTAC Rusiya KİV-lərinə istinadən bu barədə xəbər verir.
Yunan-Roma güləşi üzrə üçqat Olimpiya çempionu, Rusiya Dövlət Dumasının deputat etikası məsələləri komissiyasının üzvü, deputat Aleksandr Karelin bəyan edib ki, ABŞ tərəfinin yaranmış vəziyyətdə qərəzli maneçilik törətməsini hesab etmir. O deyib: “Mən bunu böyük siyasətə deyil, Amerika diplomatik missiyası konsul xidmətinin işləri ilə bağlı xərclərə aid edirəm. Onlar haradasa reqlament müddətlərinə riayət etməyiblər və indi viza verə bilmirlər. Mən bu hadisəni mürəkkəb casus qalmaqalı kimi şişirtməyin tərəfdarı deyiləm”.
Aleksandr Karelin bildirib ki, Rusiya idmançılarına viza verilməyən yeganə dövlət deyil. O deyib: “Zənnimcə, Dünya Kubokunun təşkilatçıları çox şey itirəcəklər. Çünki mənim aldığım məlumata görə təkcə rusiyalı güləşçilər deyil, xüsusilə son illərdə keçirilən kubokların favoriti sayılan İran nümayəndələri də viza almayıblar. Həmçinin Qazaxıstan və deyəsən, Azərbaycan tam komanda ilə iştirak etmirlər. Bu cür yanaşmada təşkilatçılar nəinki zallarda, hətta yarışların yayımında da bütün tamaşaçıları və auditoriyanı itirəcəklər”.
Rusiya Dövlət Dumasının deputatı Vitali Milonov, öz növbəsində, hesab edir ki, ABŞ hökumətinin rusiyalı idmançılara viza verməməsinin səbəbi Amerika yığmasının düzgün yarışmada onların qarşısında dayana bilməməsi qorxusudur. “Bu ölkənin cılız, zəif oyunçuları bizim normal idmançılara dərhal uduzacaqlar və onları məğlubiyyətdən yalnız belə dəhşətli və rəzil üsulla xilas etmək olar”, - deyə V.Milanov “НСН”in efirində bəyan edib.
Rusiya xarici siyasət idarəsinin rəsmi nümayəndəsi Mariya Zaxarovanın sözlərinə görə, Amerika səfirliyi bu ölkənin öhdəliklərini kobud şəkildə pozur. Rusiya XİN-in rəsmi saytında M.Zaxarovanın bəyanatında, həmçinin bildirilir: “Bu barədə hələ fevralın sonlarında göndərdiyimiz notaya baxmayaraq, amerikalılar bu məsələni son dəqiqəyədək uzadıb, yalnız indi bizə başdansovma cavab veriblər. Cavabda növbəti dəfə guya konsul personalının çatışmazlığına istinad edilir”.
Bölmənin digər xəbərləri
