Ali təhsil müəssisələrində tələbələrin köçürülmə səbəbləri araşdırılıb
Bakı, 10 yanvar, AZƏRTAC
Təhsil İnstitutu tərəfindən həyata keçirilən “Tədqiqat mentorluq” proqramı çərçivəsində Azərbaycandakı ali təhsil müəssisələrində təhsilalanları transferə təşviq edən/məcbur edən səbəblər araşdırılıb.
İnstitutun Təhsildə strateji tədqiqatlar şöbəsinin müdiri Könül Abaslı AZƏRTAC-a bildirib ki, tədqiqata 2017-2021-ci illərdə transfer prosesində iştirak etmiş tələbələr cəlb olunublar. Tədqiqat çərçivəsində tələbələrlə onlayn sorğu keçirilib. Sorğuda ümumilikdə 112 nəfər iştirak edib.
Araşdırma ilə bağlı hazırlanmış hesabatda bildirilir ki, transfer prosesinə əsasən ali təhsil müəssisələrinə daha aşağı balla qəbul olan tələbələr müraciət edirlər. Həm qadın, həm də kişi cinsindən olan tələbələrin transfer prosesində iştirak etmə səbəbləri içərisində ailə-məişət (yaşadıqları ərazi ilə təhsil aldıqları ali təhsil müəssisəsinin fərqli şəhərlərdə/rayonlarda olması, ev işləri, uşaq qayğısı və s.), karyera-iş (transfer olunmaq istədikləri universitetin təhsil aldıqları universitetlə müqayisədə onların karyeralarına və iş imkanlarına daha müsbət təsir edəcəyi, iş yerləri ilə yaşadıqları ərazi arasındakı məsafənin uzaqlığı və s.) və maliyyə məsələləri ilk sıralarda yer alır.
Tələbələrin təxminən 40%-nin transferdən öncə təhsil aldıqları universitetlərdəki sosial fəaliyyətlərdən razı olmadığı ortaya çıxıb. Tələbələrin təxminən 62%-i tədris olunan fənlərin çətinliyinin başqa ali təhsil müəssisəsinə transfer olunmalarında böyük rol oynadığını qeyd edib. Bu nəticəyə əsasən tədris olunan fənlərin çətinliyinin tələbələrin başqa təhsil müəssisəsinə transfer olunmasında nəzərəçarpacaq rolu olduğu qeyd edilə bilər.
Transfer üçün müraciət edən kişi və qadın tələbələrin əksəriyyətinin sosial və humanitar ixtisas qrupu üzrə təhsil aldığı müşahidə olunub. Transferdən öncəki təhsil müəssisəsində qiymətləndirmə, idarəetmə və tədris prosesində qarşılaşdıqları ədalətsizliklər tələbələrin transfer olunmasının səbəbi kimi çıxış etmir. Tələbələrin transferdən öncə təhsil aldıqları ali təhsil müəssisəsinin akademik heyətinin peşəkarlıq səviyyəsi və təhsilin keyfiyyətindən məmnunluq səviyyəsi ölçülüb.
Tələbələrin 70%-nin akademik heyətin peşəkarlıq səviyyəsindən, 79%-nin isə təhsilin keyfiyyətindən məmnun olduqları müşahidə edilib. Nəticələrə əsasən, keyfiyyət faktorunun transfer prosesində əsas rol oynamadığı qeyd oluna bilər.
Bölmənin digər xəbərləri
