ALİ TƏHSİL MÜƏSSİSƏLƏRİNƏ QƏBUL OLUNANLAR MÜVAFİQ QEYDİYYATDAN KEÇMƏLİDİRLƏR
Bakı, 7 avqust (AZƏRTAC). Tələbə Qəbulu üzrə Dövlət Komissiyasından (TQDK) bildirmişlər ki, 2009/2010-cu tədris ili üçün Azərbaycan Respublikasının ali məktəblərinə qəbul olunmuş abituriyentlərin siyahısı avqustun 5-də saat 14:30-da TQDK-nın internet saytında yerləşdirilmişdir. Abituriyentlər yerləşdirmənin nəticələri barədə məlumatı mobil telefonla “İmtahancell” xidməti vasitəsilə də öyrənə bilmişlər.
Nəticələrin açıqlandığı ilk iki saat ərzində internet və “İmtahancell” xidməti ilə abituriyentlərin operativ məlumat almasında müəyyən texniki məhdudiyyətlər meydana çıxmışdır. Komissiyanın yüksək sürətə hesablanmış mərkəzi serveri eyni vaxtda 80 minədək istifadəçinin müraciət etməsi ilə əlaqədar yaranmış yüklənməyə cavab versə də, əlaqə zəifliyi olan ayrı-ayrı provayderlərin istifadəçiləri qeyd edilmiş vaxtda sayta daxil olmaqda çətinlik çəkmişlər. Lakin saat 16:30-dan etibarən bu çatışmazlıq aradan qalxmışdır.
Cari ildə ali məktəblərə ayrılmış qəbul planı 94,65 faiz yerinə yetirilmişdir.
Ali məktəblərə qəbul olunanlar avqustun 17-dək sənədlərini daxil olduqları təhsil müəssisəsinə təqdim etməklə qeydiyyatdan keçməlidirlər. Müəyyən olunmuş müddətdə qeydiyyatdan keçməmək abituriyentin müvafiq ixtisasa yerləşdirilməsindən imtina etməsi kimi qiymətləndiriləcək və onun qəbul olunması haqqında əmri ali məktəbə göndərilməyəcəkdir.
Bölmənin digər xəbərləri
