Peşə təmayüllü siniflər əmək bazarının gələcək kadrlarını yetişdirir
Bakı, 25 avqust, AZƏRTAC
Müasir əmək bazarının tələblərinə uyğun peşəkar kadrların hazırlanmasında şagirdlərin erkən yaşdan müxtəlif peşələrlə tanış olması və praktiki bacarıqlar qazanması mühüm əhəmiyyət daşıyır. Bu baxımdan peşə təmayüllü siniflər şagirdlərin həm ilkin peşə biliklərinə yiyələnməsinə, həm də gələcək təhsil və karyera seçimlərini daha şüurlu şəkildə müəyyənləşdirməsinə imkan yaradır.
Bu fikirləri AZƏRTAC-a açıqlamasında “Peşə təmayüllü siniflər” layihəsinin rəhbəri Arif Pənahov deyib. O qeyd edib ki, layihənin əsas məqsədi 10–11-ci sinif şagirdlərinin müxtəlif peşə ixtisasları üzrə ilkin bilik və bacarıqlar əldə etməsinə şərait yaratmaq, onları seçdikləri peşə sahələri üzrə təhsillərini davam etdirməyə təşviq etməkdir. Layihə çərçivəsində şagirdlərə iki peşə ixtisası ilə yanaşı, “Əsas səriştələr” fənni də tədris olunur. Bu fənn üzrə peşə etikası, estetika və özünüifadə, zamanın idarə olunması, şəxsi brendinq, CV yazılması və yumşaq bacarıqlar kimi mövzular öyrədilir.
Müsahibimiz bildirib ki, layihənin əsas istiqamətlərindən biri də şagirdlərdə sahibkarlıq bacarıqlarının formalaşdırılması və əmək bazarının tələblərinə uyğun kadrların yetişdirilməsidir. Şagirdlər nəzəri biliklərlə yanaşı, praktik bacarıqlar əldə edir, müxtəlif peşələr üzrə ilkin təcrübə qazanır, əmək bazarı və iş mühiti ilə tanış olurlar. Eyni zamanda, komanda işi, məsuliyyət, ünsiyyət və problem həll etmə kimi vacib bacarıqlarını inkişaf etdirirlər. Bu da onların gələcək peşə və ixtisas seçimində daha düzgün qərar verməsinə kömək edir.
Arif Pənahov vurğulayıb ki, 2026–2027-ci tədris ili üzrə Peşə Təmayüllü Siniflər layihəsi çərçivəsində müəllimlərin işə qəbulu prosesinə maraq yüksək olub. Belə ki, ümumilikdə 207 vakant yer elan edilib. Onlardan 151-i ixtisas müəllimi, 56-sı isə qrup rəhbəri vəzifəsi üzrədir. Vakansiyalar üzrə 5845 namizəd müraciət edib, müəyyən edilmiş tələblərə uyğun olan 2617 namizəd imtahan mərhələsinə dəvət olunub. Bu göstəricilər vakant yerlər üzrə rəqabətin yüksək olduğunu göstərir.
Layihə rəhbəri qeyd edib ki, peşə təmayüllü siniflərə şagirdlərin marağı son illərdə nəzərəçarpacaq dərəcədə artıb. Bu dinamikanın əsas səbəblərindən biri təhsilin praktikyönümlü olmasıdır. Tədris prosesində nəzəri biliklərin praktiki bacarıqlara inteqrasiyası şagirdlərə erkən yaşdan öz potensiallarını üzə çıxarmağa və daha aydın karyera planlaması aparmağa imkan verir. İl ərzində keçirilən ustad dərsləri, müəssisələrə təcrübə səfərləri, sərgi və təqdimatlar, eləcə də müasir tədris metodlarının tətbiqi peşələrin mənimsənilməsini asanlaşdırır. Artan marağın nəticəsi olaraq müraciət sayı 20 nəfərdən çox olan siniflərə qəbul müsahibə əsasında həyata keçirilir.
“Layihənin şagirdlərin gələcək peşə və universitet seçimlərinə təsirinin artıq konkret nəticələri də var. Məzunlar arasında məktəbdə yiyələndikləri ixtisas üzrə peşə və ya ali təhsil pilləsində təhsilini davam etdirənlər, əldə etdikləri bilik və bacarıqlar əsasında birbaşa əmək fəaliyyətinə başlayanlar, öz sahəsində peşəkarlaşanlar, eləcə də yerli və beynəlxalq sertifikatlar əldə edənlər mövcuddur. Bu nəticələri daha sistemli şəkildə ictimaiyyətə təqdim etmək məqsədilə “Uğurlu məzun” layihəsi həyata keçirilir. Layihə çərçivəsində məzunların sonrakı təhsil və karyera dinamikası, eləcə də peşə təmayüllü siniflərin onların peşə seçimində oynadığı rol nümayiş etdirilir”, - deyə o bildirib.
Arif Pənahov əlavə edib ki, müasir əmək bazarının sürətlə dəyişən tələbləri də layihədə nəzərə alınıb. Bu istiqamətdə İKT profili nəzdində yeni yaradılan “Dron təmiri” istiqaməti diqqət çəkir. Yeni istiqamətin 2026–2027-ci tədris ilindən etibarən pilot layihə olaraq bir neçə məktəbdə tətbiqi nəzərdə tutulur. Bu istiqamət şagirdlərin müasir texnologiyalarla bağlı bilik və praktiki bacarıqlarının inkişafına imkan verəcək. Gələcəkdə də əmək bazarında baş verən dəyişikliklər, texnoloji yeniliklər və şagirdlərin maraqları nəzərə alınmaqla yeni ixtisasların “Peşə təmayüllü siniflər” layihəsinə əlavə olunması planlaşdırılır.
Müxbir-Nərmin Muradzadə
Bölmənin digər xəbərləri
